睇咗幾日阿張生(定係章?)既行文,我唔想用"好好笑"既眼光去睇,但都係笑咗.我笑既唔係因為閣下無知,坦白講我唔識得閣下,自問唔敢就閣下個人狀態妄下定論.反而我係笑人類對自身無知程道既低估,同自身價值既無限放大.
就講有無神,一個最原點既問題,但其實亦根本係一個信則有不信則無既個人選擇.
呢個世界唔見得有神會美好尐,而無神亦唔會差咗去邊,閣下如果有睇過古往今來因為宗教而引起既罪行/紛亂/戰爭就會明白.當然呢尐野有無宗教都會存在,原因係人本性上重有自私呢個原素,就會不停地咁發生.相反,當人性入面有倫理,有慈悲,有友情有愛情有親情,好事亦會係最壞既時候出現.
既然係咁,關閣下所謂既神乜野事先?係要有神閣下先識得孝順父母咩?先識得不可偷盜咩?小學以至衙差叔叔甚至個社會都好似有教果喎.咁係唔係有神,呢個世界就會無咗自私殘酷呢?無咗兄弟鬩牆?世間上所有事情都可以得以化解呢?
如果有閣下所講既神,而佢又給予人類呢種本性既話,咁即係神要玩人一鑊.要榮耀神有天使呢種過晒QC既都唔夠,重要造多班擺明係次貨既生化物黎進行精神到物理,個人到團體,人內到大自然既互片.就好要人凌遲咁,但層次就更加深入而徹底.殘忍得黎都幾變態.擺明就係自身宣洩扭曲咗既控制慾,失心瘋式既毁滅思想.咁講你話既神就真一個飄流係各次元,而又極度無聊空虛同無責任感,確定唔到/唔夠自己既不死老宅.然後有日屎忽良造咗班同自己一樣既野出黎,就話用黎榮耀自己,肯定自己.但又話俾人知其實已經有另一批產品出咗黎,話係好得既咁,亦生活係一個唔使食野又無啫啫既世界入面,而呢班產品又係無人見過既.
喂,大佬,作大都起個稿先講啦.
請記住神都係由另一個人話俾閣下知有咗喎,唔係閣下自己見過.所謂既感受過,咁實在係自己先知,如果唔係唔會有咁多假見證俾人一五一十咁踼爆或者係有待踢爆.唔通假既閣下又信?咁如果明知係假既都要信,唔係唔得,咁即係唔係咁多道理,以後閣下叫人去聽道理就要改為去聽發翕風.
咁如果閣下真係見過神既,咁勞煩閣下提出可見/可測度而反對不能既證據,又或者你可以叫佢係唔信既人面前出現下,咁你咁多日黎既護教言論都算得上係有閱讀價值.反之,實在想閣下分享下究竟閣下信緊既係乜,係人地話你聽既一個幻想吖?敬待垂告.
又如果閣下叫唔郁阿老耶,不如咁啦,無論天基摩都係話自己既門徒係卑微既,眾人係平等既,係聚財富於天國既;咁大家都係老耶門生,不如你發起以我地阿特區官府話事人阿曾生及一眾聲稱自己係耶徒既達官貴人,發放自己所有財富俾窮人.無理由佢地攞住耶教個名號就得到另類道德保証,叫佢地做返樣係阿穌做過既野都唔得,一樣咗喎,多就話啫.
咁樣樣都唔得,唔好問剩係信,即係要人用五蚊買一個禮盒,禮盒入面係乜唔講,要估吓值唔值五蛟.嘩,直情係街邊老千仔手法.如果入面既野值五蚊,咪果禮盒都蝕埋?個老千仔食風呀?
講咗一大輪,其實都係想帶出一樣野.神,係證實到之前,都只不過係一個幻想,一塊招牌.天基摩回,亦同樣只係一個以同一個招牌,用黎欺世盜名呃飯食既集團.唔該唔好話末世聖徒有分別,邪教之名連得黎就世界各地都有唔同既case,但似乎閣下教會所信奉既都係同天基回一樣,都係一個幻想.不如試吓咁啦,你地神職人員自耕自食,十一都唔要,然後再傳教.咁會唔會就算唔被人接受,只要唔好麻煩到人既,本來都無乜謂.
但到底傳教係咪一種麻煩既事呢?對於唔信既人,答案係絕對既.以前既資訊無咁發達,好多資訊都好難流傳到民間.但時至今日,只要有心想知,幾乎任何資訊都可以係互聯網度搵到.所謂既分享如果係被動式既,我諗會比較易於有人聽囉.
咁當然,如果傳教同各護教人仕可以基於兩種人類基本情操去做,我相信會好得多,就係禮貌同良知.
禮貎唔單止係話言談間既禮貎,而係唔好當唔信或者未信既人係迷羊;唔係每一個人都可以接受離開聖經就得唔到驗證既道理.亦希望傳教/護教人仕明白,自己既學說都實在係千瘡百孔,一概不通.請先攪好成個presentation先同人分享啦,而且分享時,如果可以更中立持平,基於事實,同埋唔好帶有說服既,呢種基本既尊重,我諗係人溝通上係必需既.
良知就係只分享真實所知,真實所見既全部,而唔係將道聽途說既加重語氣又話係真理.
唔好話人心硬,如果有人可以證實到老耶,都唔會有呢個網.但兩千幾年啦,有邊場戲好架? |
2009/5/17 18:02
| 
2009/5/19 01:25
|