返回列表 回覆 發帖

老翻之厲害 高 域

從前,睇戲一定入戲院,皆因蘇州過後冇艇搭。影碟的出現,扭轉了觀戲模式,睇戲可以係屋企,唔使同人逼;發行電影可以唔理戲院,直接出碟,慳番口水同院商傾分帳。
影碟,旣是煞星,也是救星。好戲上畫,唔使趕去睇,遲幾個月出碟補睇,附送製作特輯,條數更襟計。因此,電影市道落斜坡,幕後黑手首推影碟。但另一方面,影碟使電影普及率上升,一隻碟可以幾人睇,又可以借人睇,累積知名度,續集上映時,市場更大。
想起LD橫行年代,那時過海買貨,幾百蚊一隻外國經典影碟,價錢嚇人。最豪一次,花七百蚊買隻黑澤明《武士勤王記》,至今仍在保存;二百幾蚊港片,不計其數。今時今日回看當年行為,傻仔一名,現時藍光碟賣二百幾蚊,效果靚到無......倫。
效果靚,都不及老翻勁。正版做不到,老翻包搞掂。任何殘舊戲、冷門片、另類作,都能此中尋。據聞有專業團隊四出搜羅,套戲有幾勁、幾有藝術性、幾大市場,一看就知,叻過大導演。
影碟之海,簡直無窮無盡,許多寳藏無法擠進我們市場,老翻便引貨進來,非洲戲、南美戲、默片、實驗片、禁片等,都可以豐富觀影經驗、開拓視野,戲院根本比唔上。更厲害是,老翻有專業團隊翻譯為中文字幕,解決語言隔膜。
老翻的勁揪,可以自製導演專輯,把分散不同電影公司的作品統一裝盒,還特製禮品包裝,猶如珍貴藝術品。早前買了盒尙盧高達全集,有中文字幕,又贈送原聲碟,只花四百多元,畀鬼佬看見,簡直流晒口水,因為外國根本沒有出版過高達全集。
老翻的周全服務,更是誇啦啦。凡是電影,都可以轉化為DVD。楊德昌的經典《牯嶺街少年殺人事件》,至今未發行過DVD,但老翻能人所不能,為你作出轉化,價錢照舊,問你服未?
老翻的功勞,難以估計。舉個例,廣大同胞從封閉走向開放,可以在短時間內認識羅西里尼、尙高克多、塔可夫斯基、柏索里尼、尊福等大師,連第三世界戲種,一一了如指掌,全靠老翻。沒有老翻,他們無可能欣賞大師名片。
看老翻,猶如污辱電影,不應推廣。但老翻在某程度上,肩負傳承經典、普及電影的作用,卻是事實。

http://www.macaodaily.com/html/2010-08/17/content_498772.htm
返回列表
高級模式 | 發新話題
B Color Image Link Quote Code Smilies
換一個