離教者之家 討論區 | 離教百科 | 離教視頻 | 手機版 | Facebook 專頁 | 聯絡電郵 | RSS 訂閱
 
手機檢視本頁 | 简体中文 | 字體縮小 字體還原 字體放大 |

離教者見證

※ 撰寫你的離教見證 ※

主題: 我從基督教而來的傷害 日期: 2010-06-22
作者: AliceP 來源: 本網見證

大約2009年10月尾,我係hkuspace進修。當時上QM堂,大約第五個星期。果晚我做兼職,放工就返學。入到課室放低個袋,跟住排隊點名。見到阿俊(男教友)從門口行入嚟,原來呢個男仔同我同班,點解之前幾堂見唔到佢既?(係上個學期,我同佢同班都係上stat。)

之後三堂都有留意佢,但係就從來未同佢講過一句野。直至有一晚,我遲到。有D空位就比D人擺晒袋。我行到最尾果行又行返轉頭,見到阿俊側邊有個空位,於是同佢坐。一路上堂,我係度聽書,無同佢講野。而佢就自言自語(例:啊~原來係咁既……)令人覺得佢幾友善。當時我覺得,識多個人都好呀,以後有野諗唔明又可以問下佢意見。跟住我就問佢功課,果題點解咁做……我地就開始交談。佢話上個sem已經見到我,話我成日問阿sir一D怪問題,所以留意到我。

我地交換facebook,臨落堂,我走先。話以後facebook聯絡。我去完toilet出來,見到佢仲未走,係度等緊lift。於是我地一齊搭地鐵。本來佢搭巴士,但係果日開始,佢就同我一齊搭地鐵。

第一次一齊放學,我同佢保持距離。係車廂入面,我地閒話家常。佢狂問我屋企既野,又問我同父母相處成點。跟住佢又講佢父母離婚……

好似第二次放學果日傾傾下計知道佢係基督徒,當時我已經有D忌。到左下星期返到學校,放學果時打算走先,唔再同佢傾計。但係當時我未有男友,之前識左一個細過我五年既男同學又發展唔成。又想有人陪我,所以行出課室門口又折返轉頭搵返佢。

呢個係惡運既開始,亦都令我更加清楚見識到:咩叫做賤種,傳教機器。

大約第三次一齊放學果日,我同佢係地鐵車廂入面一齊坐。佢對住我UN腳。傾傾下計,我話:「你食左飯未呀?不如我地一齊食飯囉?」佢話好。於是我地去左旺角食飯。行出月台果時,我都話:「當我知道你係基督徒之後,都有D忌,本來諗住唔再同你傾計。」佢話:「咁你唔想同我傾計咪同我講囉。」我問佢:「你唔會傳教呀嘛?」佢話:「我傳教好勁架喎,通常傳左,人地都唔知。」

以下係我以前寫既日記,有好多都delete左。因為誤信教會,認為會被舊我影響,所以delete左好多篇。(每當諗起呢點,就令我更加憎基督教,我d心血無晒)


2009年11月26日

昨日,同阿俊係xxx(我屋企附近)XX餐廳食野。

上星期日晚(11月22日),約十一時打比阿俊,第一次打電話比佢。

尋日,返QM(學校進修),坐係阿俊隔離。佢今日著左件紫色衫,幾好睇。估唔到佢會記得,真係著返嚟比我睇。今次係第二次坐係佢隔離。第一次大約係一個月前。

我地放學搭地鐵,佢係落電梯開始:「唔好意思,我要打幾個電話先。」於是佢就一直傾電話,傾到北角站轉車。入到將軍澳線既列車,我見到同班同學。佢見到我地,大家無出聲。阿俊依然繼續傾電話,我就係度睇住佢傾電話,直至車卡太嘈又收唔到,佢被迫收線。

我:你諗住傾住電話咁同我食飯呀?
俊:傾埋一個先,我約人去燒野食。
我:如果星期一果堂識到人,我唔會同你果晚去食飯,因為星期一係同你去食晚既。
俊:我有少少受寵若驚喎。
我:因為我唔想無左你呢個朋友。
俊:你講果個男性朋友?
我:我當佢係三(三七)。
俊:唔係喎,你當佢係100%喎。
我:我係無人搵先搵佢之嘛,佢係三,我依家搵緊七……咁要有個人比我搵先得架~~
俊:你講野好大聲呀,你係咪想有個男仔同你講:小姐,你想搵人呀,不如搵我啦。
我:果d都變態架啦,通街識人。

(呢個基督徒跟本一早就知道我想搵男朋友,所以就利用男女感情傳教,呃我入教會)


2010年1月26日

阿俊話:未了解一個人之前,唔好投放感情。

(依家終於知道呢個人就係佢!)

可能你會被一剎那既感覺欺騙左,佢叫我返呢現實,理智D。


2010年1月28日

上星期六晚去左個阿俊介紹既團契。果日既主題係:真的戀愛了。

(呢個男基督徒故意引我返教會,因為佢去外國旅行之前,我打電話比佢,無人聽,跟住我 send 短訊比佢,問佢幾點上機,佢一去幾日,咁我就呢個星期都無得同佢傾電話。佢收到我個 sms 之後打返電話比我,同我傾左一陣電話。好明顯,呢個男基督徒係故意利用男女感情/曖昩關係呃我返教會,一段友情會難捨難離?無諗過有朝一日,要用自己既日記去證明呢個係一個幾咁無恥既基督徒,傳教傳到癲既基督徒)

去到教會,大家一齊唱歌。再分組討論,我幾鍾意聽佢地發表意見,交流下大家既生活。其實我都幾鍾意返團契,不過,大前題係:佢地唔可以強迫我每個星期都一定要返。團契完左之後同個FD 同埋佢台灣既FD去食飯。佢地兩個既性格有少少似,大家都鍾意講笑,性格外向。


2010年2月4日

睇返以前保留既 msn 對話,應該係2月4日果晚,我同佢去左花園餐廳食牛扒。我地好似情侶咁打對面坐,佢用隻腳輕輕掂下我隻腳(佢一定要伸隻腳過來先掂到我隻腳,再次聲明:我無誤會!)

佢話:我選女朋友睇樣架~(當時佢從無提過一定要基督徒做佢女友)
我話:其實我有諗過唔再同你做朋友架。
佢話:可能我會選個唔靚架呢~(佢望住我講)

(你認為友情係咁架咩?普通朋友咁對話架咩?但係當我同另一個男教友講開呢件事,個男教友偏幫呢個阿俊,格硬話一切都係我誤會!依家諗返起,基督徒根本思路有問題,而且比意見人果時懷有私心。)


2010年2月12日

呢個星期,我唔想見阿俊,因為我依然有少少懷疑佢。佢就約大家(團契既人)一齊行花市。

果日好迫,阿俊、我、另一個好需要人照顧既男團友一齊行。我有時捉住阿俊件衫。行行下,我企左係男團友同埋阿俊中間。佢攬住我地兩個,好似借d二攬住我咁。跟住呢晚,呢個男基督徒態度曖昧。絕對唔係我諗多左。

臨走果時,我行去巴士站。阿俊走過來話:你返到屋企打比我啦~


2010年2月13日

中午4時,去教會聽崇拜。帶左本簿仔去寫重點。關於搵屬靈既伴,牧師問我地呢一刻諗起邊個。我邊個都諗唔到,都係等天安排啦。

其實我都同意,信黃大仙既人,唔覺得佢地有相處和睦。而佛教徒對人好,大多數因為害怕輪迴。怕報應而對人好,而唔係出自愛心。我諗起最近認識既同學,初時由於見到佢會提一D佢唔認識既同學取notes。同埋佢態度和善,所以同佢做FD。後來先知道佢係佛教徒。大家傾計果時,佢有少少提到鬼神、輪迴,覺得佢對人好係怕被判入畜牲道,並非出自愛心。今次又係「因誤會而認識」。

臨走果時見到阿俊同其他教友傾緊計,而我又趕住去酒樓,所以打完招呼就走。因為屋企人唔知我去左邊,仲講明今日一定要食團年飯。阿俊叫我下次去之前打個電話比佢,其實我唔打電話比佢地,係因為覺得大家去到就會見到架啦。(當時我仲未放個心落去,總覺得佢好似氹緊我返教會)

牧師話:搵伴係屬靈道一齊成長既好處係,當係屬靈既路上跌倒,有人會扶起你,提醒你。又話屬靈既伴唔係行街睇戲既伴。上帝既話語本身帶住能力,真正成長要下苦工。打算買本聖經,去感受一下經文既力量。

以前覺得講見證既人,可能只係佢自己諗多左,甚至只係佢自己既聯想。今日,係教會閣樓,有種感動改變左諗法。我又唔係佢,點知佢既經歷係點?我又點知佢既感受?(依家覺得呢d只不過係自己當時有靈感,並非甚麼感動)

第二次去教會聽崇拜,男教友送左本粉紅色聖經比我(之前傾電話,佢話送比我,而我前排成日著粉紅色衫),本聖經銀色邊,有拉鏈。仲用張書簽,再用我個名最後兩個字接住寫兩句野比我。

又有一次崇拜,佢痴住我坐,仲哄到好埋同我講野。

本來打算同佢,加多一個男教友去食晚飯。點知坐係佢後面果兩個女教友,見到佢就笑得好開心。一個係咁係男教友耳仔邊講野,兩個女教友係咁撩佢傾計,仲約佢陣間食晚飯,佢一口就答應。(喂!我同佢唔係約左架咩?)

一去到餐廳,我同一個睇中佢既女教會打對面坐。大家側邊都有一個空位。阿俊一去到就立即坐係女教友側邊,個女教友好開心。成日藉住玩咁拍打男教友,仲差d握一握男教友既手腕。而男教友好開心,當我無到。全程只顧住同兩個女教友傾計。睇中佢既女教友亦無理我。我問佢地叫咩名,佢地講左自己個名之後,無再問我叫咩名,全程顧住同個男教友傾計。

(呢d就係基督徒啦!事後個男教友仲屈我,話我講得誇張,講到班女教友好似無咩野咁。呢個男教友真係好虛偽。而女教友肯定等男人等左好耐)

自從呢日之後,男教友成個變晒。以前關心我,好正經既佢消失左。


2010年5月2日

某個好醜樣既男教友(當叫做: w)唔想返屋企,其他人都係。以阿俊買 CD 呢個藉口,大家係旺角行街行左個幾鐘。一直以為阿俊都鍾意 E(睇中佢,拍打佢既女教友),原來一直都係E主動痴住阿俊。尋日,阿俊比我痴住佢,仲懶係同我傾密傾咁,(E搶阿俊個手提電話,我行過去阿俊度,阿俊係 E 面前係我身邊講野,E見到就立即比個手提阿俊)由得E誤會。跟本佢唔志在其他女教友點睇佢。

E同埋另一個對佢有d意思既女教友(當係: Y)見到我同阿俊兩個一齊行,佢地好明顯唔開心。仲行錯路。阿俊真係若無其事咁,明明知又扮唔知。我一個月前已經抽身而退。一隻手掌拍不響。如果唔係阿俊配合我,E佢地會誤會咩?好明顯佢既目標唔係E。


2010年5月11日

岩岩睇完《天作之盒》,套戲強調:做好今日既野先,聽日既野聽日先愁。彩虹係圓形,一半係人間,一半係天堂。當我地完成使命,離開呢個世界既時候,就會到達彩虹既另一邊。要醫好人既心,要先醫好自己既心。將明日交比上帝安排。

(表面上睇,基督教好似好好咁,叫人不擔憂,而福音電影令人覺得唯美,所以令人對基督教有好印象。其實係包裝得好好既邪教!)


2010年5月12日

其實以前阿俊叫我有心理準備,佢可能對團契既人有好感。

何必自討苦吃?你同阿俊既時機未到唧,等神安排啦,當佢有感動既時候,自然會搵你。被歌詞「能為愛戀學習按捺,情信寄進心內」誤導。

(依家唸返轉頭簡直係白痴!兩個人係度爭一個根本兩個女人都唔鍾意既男教友。)


2010年5月19日

以前會好努力咁去了解身邊既人,了解佢地既行為代表咩。

後來發現無論你點諗,都證實唔到。越深入去諗一個人,就越不了解佢。可能大家對對方既了解,都只係表面上既了解。又諗阿俊講過:「人要時間去慢慢了解。」

咁係咪要完全了解一個人先可以去喜歡果個人?但係有d人第一眼見佢已經唔會喜歡佢,無論將來幾了解佢,我都唔會喜歡佢。無feel就係無feel。

牧師講過,只要個心向外,一切問題會迎刃而解。

腓立比書四章4-7節:「你們要靠主常常喜樂!應當一無掛慮,只要凡事藉著禱告、祈求和感謝,將你們所要的告訴神。神所賜出人意外的平安,必在基督耶穌裡,保守你們的心懷意念。」

以後我會盡量無掛慮咁生活,咁個人就會無咁瘦。同埋依家已經遠離一d將壓力卸比我既人,我會傾向與團契既人相交。因為大家會互相支持,而唔係好似出面d人咁互相發泄。

又開始明白,點解有d基督徒會抗拒同非基督徒相交。但係我唔排除有d基督徒既靈性根本無成長,同出面既人無分別。有個姐妹話,佢選另一半,不一定要基督徒。因為有d基督徒未必會跟聖經所講去做,未必做得好。而非基督徒做既野,亦有做得好,只係佢地無一個機會去認識聖經或基督教。我曾經對基督教有好深既誤會,後來發現好多時只係 d人既問題。

(當時我仲未發現基督徒醜惡既一面,一直以為佢地好好,因為男教友誤導我。)


2010年6月1日

尋日散步,諗到點解有人會覺得詩歌幼稚。因為我地年幼果時,兒歌既歌詞意識健康,無情愛原素。直至初中,流行曲全部圍繞情愛。踏入呢個階段開始,大部分人既人生就沉迷情慾。而詩歌既內容健康,令人聯想到兒歌,有種「幼稚」既錯覺。其實詩歌一d都唔幼稚,只係同兒歌有一個共同點:就係健康!唔會令人陷入情慾既試探。

上次團契,導師問我「為之生為之死既人生目標」。

(呢個階段,依然都基督教有好感。因為無諗過,叫人唔好聽流行曲,要聽詩歌,背後既原因係:要幫你洗腦。音樂可以令人輕易記得歌詞,令人唔再覺得「主耶穌基督」陌生,係一個宗教。話人沉迷情慾,等你將自己既愛情放埋一邊,專心事奉教會,係教會等神安排你既另一半,等運到,呢個猶太教重男輕女,反對婚前性行為目的係,保持處女之身比男基督徒。思想控制女基督徒只選男基督徒,無為女基督徒既將來著想,你變成老處女都唔關佢地事,成日叫你唔好出去識男仔,要搵就搵返男基督徒,但係又叫你唔好返其他教會,等神安排。而信左教既女教友呢幾年就一直單身。有兩個女教友既男友都係非基督徒。連教福音班導師既老公都係非基督徒。一係就女基督徒信主前同非基督徒拍拖,再帶個男仔返教會)


2010年6月6日

阿俊話佢好想係呢個團契入面搵女朋友,依家無特定一個。又話唔知係咪同E有曖昧,又話對佢既事無興趣知。

初相識果時,果個sem 就呢完,下個sem大家唔同班,我以為佢唔會繼續同我食飯,點知又帶定時間表同我夾時間。可能兩個睇中佢既女教友既出現係神既安排,如果唔係佢地我唔會係呢間教會,唔會成長。

初時根本唔信主,係見到女教友b 成日望住阿俊,想搶走佢,先返教會看住阿俊,之後又有感動信左主。(依家發現果時開始被洗腦)

導師比左本「蒙X恩的女子 未婚X人祈禱手冊」,我比左阿俊睇。

可能阿俊知道我好想搵男朋友,所以講明話係呢個團契入面搵,尋覓中。但講明我仲差好遠。有幾個姐妹佢都好欣賞。

(事後同一個網友傾計,再問清楚呢個男基督徒,先發現我一直被誤導,佢用曖昧關係帶女仔入教會,留d女仔係教會)

至於「蒙x恩的女子  未婚x人祈禱手冊」,根本係不可理喻既小冊子!佢話越嚟越多女性單身,係由於女生不符合資格做基督既新抱!又話要相信上帝既安排,男女既數目係對等既,一公必有一母。簡直白痴!難道基督教仲比全世界政府既人口統計更清楚?叫單身女子每日禱告就有效,nonsense! 男女基督徒比例懸殊,想搵男基督徒既女教友咪至少一半要獨身?到時又話獨身係神既恩賜,簡直自圓其說!

難怪咁多單身女基督徒。對單身女性既毒害僅次於要修女做終生處女既天主教,根本係怕女基督徒被出面既人拍醒,唔再返教會。

有個女基督徒真係坐係教會等運到,等左至少兩年都無下文。眼尾既魚尾紋仲好勁!佢廿到尾,但開始呈現老態。

教會導師話:神安排比你既另一半係最適合既。

何謂適合?根本無準則。好多非基督徒既婚姻都美滿幸福,亦有基督徒離婚。根本無統計去 support 神安排一定係最好最適合。從呢點,已經覺得基督教有少少變態。


2010年6月11日

今日終於下決定離開果個玩曖昧既男基督徒,身上既重擔好似一下子消失。我唔使再熟讀聖經,因為佢從來無諗過同我發展,只係享受曖昧關係。

頭三個月,佢都會陪我傾電話,次次放學都一齊食飯。仲試過有一次放工陪我去睇戲。行為語言曖昧,搭車又痴住我嚟坐。點都估唔到,一直浪費緊我既時間。當我 search 一d文章關於呢種人,文章所寫既全中。有個教友教我,曖昧滿三個月就要問清楚對方,確定大家既關係。

今晚8點幾,仲比藉口自己返佢果間教會,但係另一個團契。撞岩個團契今日休息。當我踏出地鐵站,係街上面行。嗅覺視覺聽覺好似全部開通晒咁,原來以前我行經呢條路返教會,都顧住諗呢個玩感情既人,從來無仔細望過條街。今晚竟然嗅到呢個地區既氣味。回想起大半年前,佢會陪我去餐廳食飯,第一次返教會果時去小巴站接我。果時冬天,佢仲話我面色蒼白。仲記得佢陪我去睇戲,之後同我搭的士返 xx(佢住果區)。依家佢一句「你誤會啦」,就強迫將呢段感情轉為友情。我唔接受。決定絕交。

當初我同佢講得好明:我要既係男朋友,唔係朋友。如果我鍾意既男仔唔鍾意我,我連朋友都唔想做。亦問清楚佢係咪傳教,因為佢話唔係,我先同佢來往。如果佢對我無意思,應該一開始講明只想傳教,男女感情免問。好多野開始左無得返轉頭。點解我要辛苦自己?我去認識基督教完全為左佢,因為佢係基督徒。

我唔會因此針對基督徒,因為出面既人一樣可以玩曖昧。既然基督徒未必係好人,非基督徒又未必係衰人。點解我一定要選基督徒做另一半呢?決定左以後唔返佢果間教會,亦唔返其他教會。我唔想再遇到一d利用男女感情留我係教會既男基督徒。打算去做義工搵男朋友,或者去報下課程,睇下識唔識到人。

與其要我睇住佢識女仔,拍拖結婚。不如調返轉,佢睇住我識男仔,拍拖結婚好過啦。佢唔接受我,又唔想我離開,又唔鍾意我識男仔,無為我將來著想,十分自私。頭三個月有陪我,之後果半年無再陪我,仲成日叫我唔好亂諗。佢同我咩關係?憑咩要我留係度?呢半年佢根本無珍惜過我。


2010年6月12日

尋晚有個姐妹建議我轉團契,之前亦有兩個弟兄叫我轉團契。

雖然我因為果個玩曖昧既男人而對基督教有d厭惡,不過主日學都返左兩個幾月,又見慣左果度d人,今日打算返埋佢。亦將我對基督教既睇法,果個玩曖昧男基督徒呢件事講左出來。導師代呢個人向我道歉。佢地話呢個人呃我,但係主耶穌無呃我。又提我,問我當初點解決志?

我話受感動,唔知點解(其實6月5日,另一個導師同我決志多一次)。跟住我又覺得上福音班聽佢地講既野又唔反感。聽牧師講道又唔反感。又問佢地,其實就咁食個橙使唔使祈禱,佢地話其實係唔使既。既然聽崇拜又唔反感,對我比較好既朋友又係基督徒,甚至連鬼佬同學都係基督徒。外面既人唔信主,但係亦唔見得佢地對我好。回想起,對我最好,最照顧我既人係基督徒。雖然好多人批評佢地,但係同佢地相處又覺得幾開心。又唔覺得同佢地有隔膜。就算同我唔同教會既基督徒,都唔覺得同佢地有隔膜。

至少佢地會聽我講心事,會陪我傾電話至凌晨兩點幾。佢地又會講佢地既野比我知。而出面既人(非基督徒)就唔會啦。識左兩年都好似唔了解咁。

好多野都令我唔明白,唔知點解,總之我唔抗拒基督教。即使半年前好憎基督徒,當時亦唔抗拒聽道。

(教會就係利用人既感情留你係度)


2010年6月12日

呢兩日開始恢復精神啦。好似大病一場咁。

又學識,時間可以令你見到對方既計劃,深不可測既企圖,損人利己,鐵石心腸既一面。又見到佢身邊其他異性大出洋相。佢竟然忍心見到佢地咁?我見到都覺得呢個玩曖昧既男教友好狠心,其他女教友好傻,佢地真係以為呢個係一個好男仔。

以咁多個月既觀察,佢根本無個女教友睇得上眼,拍拖分手好平常。講大話更加係習慣。

最難睇係,有一次落完雨,街上經過一d地方有水滴落嚟。玩曖昧既男教友同另一個對佢有d意思既女教友係前面傾計。好明顯係女既好開心,尤其是行到前面滴水既地方,笑笑口咁以為有機會親近男教友。點知男教友將佢推開,推去無滴水既另一邊。之後,再往前行,個女教友見到前面又有滴水就主動借d二痴埋男教友道,佢好開心。佢好似唔在意被推開既一幕。真係當局者迷。

我係後面睇,覺得個女教友好傻。又或者好少人會記住同人相處既每一幕每一個細節,所以好多野,好多hints,班女教友無注意到。如果佢地稍為好記性d,就知道呢個男教友係度玩野。


2010年6月16日 夜晚

而今晚,遺憾既感覺開始消失。

呢種人只見到自己,計劃入面只有自己。識得佢越耐,總覺得對住佢好唔舒服。佢將其他人既感受唔當係一回事。

尤其是果個被佢釣住既女教友。佢全日都無理過個女仔。果個女仔一直望住佢,想行近佢,而佢就顧住自己,當個女仔透明。


2010年6月19日

呢兩日都係度 search 反基督教既網站,同埋post 離教見證。

越諗越覺得果個男教友恐怖。因為玩感情點都不及用盡心思傳教,留人係教會咁恐怖。

因為玩感情既人最多都係貪開心,而傳教既話,就表明呢個人極其冷漠,毫無感情。

見佢對其他女教友既態度,都覺得呢個人變態。好明顯係度玩緊佢地,折磨緊佢地。

有個女教友今年年尾 27歲,對眼已經有魚尾紋,d紋都幾勁下,好明顯開始有老態。個男教友都好意思去釣住佢,捉實佢既感情,等女教友繼續留係教會等佢。初時以為佢只係想多d選擇,原來唔係!佢根本唔鍾意班女教友,只係利用曖昧關係留佢地係教會。而男教友係教會入面另一個團既導師。

細妹都有提過我,可能教會背後唔知比左咩利益佢,例如帶人返來帶夠幾多個 (quota) 就可以做咩職位,d奉獻可以分幾多。

我上過兩個月主日學,要求一個信徒返團契返足一年,上晒全部主日學課程以及浸禮班,跟住受浸。成為基督徒就要每個月獻上薪金既十分之一。即係薪金一萬元,就要付一千元比教會,仲多過 MPF 強積金!但係當你老左果時無錢使就係你既事!教會無義務養埋你。

原來男教友只係幫教會捉多d羊返去。前個月,佢又叫一個好多年前返過教會團契,返下又唔返既女仔來。佢對果個女仔既態度,跟我未穩定返教會果時一模一樣,曖曖昧昧咁對果個女仔,等個女仔為左呢個男教友而經常返團契。呢個女仔每次返來團契,都一定坐係男教友側邊,團契完左一齊食飯,佢又坐係男教友側邊。總之成日痴住佢。

男教友初時完全不提宗教,先捉實你既感情,再係適當時候呃你返教會。

依家基督教甚至利用潛意識呢傳教,最近買左本書叫做《開發你的潛意識》,本書教人祈禱,仲話祈禱係有效既。鼓吹呢個世界可能真係有一個神。就係因為呢本死人書誤導左我。

呢半年,我依本書既方法再結合祈禱,最終得來既只係幻覺,自欺欺人。自己幫自己洗腦。真係相信果個男教友係神安排比我既。直至我同佢有關既事同網友傾,再迫問男教友,將同佢既對話 send 比網友。經網友提醒同埋回想呢半年發生既事,終於清醒。

基督教絕對係十分可怕既邪教!

自從無再食飯前、訓覺、起身果時祈禱、無再聽詩歌、無再睇聖經,成個人鬆晒,唔再辛苦。唔使再為左果個男教友,迫自己停止獨立思考。當時以為自己受浸之後,男教友會接受我。原來唔係。可能我成日係 msn 叫佢,一星期又打一次電話比佢,係團契度又主動搵佢傾計。佢開始覺得煩。加上再直接逼問佢,誓不罷休。佢只有對我決絕。

情況類似男女正在展開發展,直至你真係覺得佢想同你發展,佢都鍾意你。你唔再懷疑佢傳教,就係適當時候帶你返教會。而剛好果日教會團契主題係:「真的戀愛了」。等你有聯想。其實佢只係佈個局裝你入去。

之後就一直利用曖昧關係留你係教會。把口拒絕你,而行為語言曖昧,等你以為佢回心轉意。一直等佢,等佢既同時,你自己為左佢返主日學、祈禱、睇熟d聖經、聽詩歌去了解佢。(佢話如果想了解佢就返教會,睇多d聖經)。
等你自己同自己洗腦,甚至返教會唔係為左佢。你將呢件事同導師講,個導師以及其他教友只會話你誤會,亂唸。夾埋一齊去呃你。原來成班人夾埋一齊去呃你一個。話知你辛苦、獨身、單身、將來會點,總之要留你係教會!不惜一切講大話!連導師都講大話!班人癲到你唔信。為傳教不惜一切。

直至你穩定返教會之後,男基督徒就會對你唔客氣,仲當眾教訓你,呼喝你。當眾對住我大聲講:「我唔鍾意佢架!要比機會其他姐妹架嘛。」跟住係我面前同另一個被佢釣住既女教友大聲傾電話。

每次團契晚飯都唔同你坐,亦唔比你坐係佢側邊。你主動坐埋去,佢就調位。你打電話問返佢,佢就話無避你,又話:「咁你都要同其他人傾計架嘛。」一直利用當局者迷既心態去愚弄你。因為佢知道,你點都諗唔到佢會不惜花三個月去呃你。就算你同出面既人講,出面既人都唔信。係咁話你誤會,你同佢地講咩,d人都會話你誤會。好似撞左邪咁。猛話基督徒好人、好人、好人,一定一定係你誤會。即使佢地唔係當時人、不在場。

佢地好似係側邊由頭到尾睇住件事發生咁,好似知道你同個男教友諗咩咁。盲目咁話你誤會。真係應驗左聖經一句:「世人係愚頑既」。你會發現,人可以蠢得咁緊要。

我不斷咁係度寫,就係因為我要將呢個邪教既真面目揭開。我唔想越呢越多基督徒。真係怕有朝一日,我細妹無端端同我講:「家姐呀!我信左主啦,好平安呀!」 ← 咁就恐怖啦。

成為基督徒就要每個月獻上薪金既十分之一。即係薪金一萬元,就要付一千元比教會。仲多過 MPF 強積金!但係當你老左果時無錢使就係你既事!教會無義務養埋你。

就係因為咁,教會成日叫d基督徒小心出面d人。話咩拉力,基督徒係上面,非基督徒係下面。一個下面既人拉一個上面既人落呢比較容易。

痴線!假既野當然無人接受啦。好多野無論你點講,講到似是而非。咩神唔可以用人既角度去理解。無就係無,感覺唔到就係感覺唔到。我唔覺得基督徒有幾純潔喎,佢地平時做d咩,根本見唔到。又未見過佢地既驗身報告,點知佢入面係點架?

今次真係下定決心啦。逢係基督徒,無論佢咩表現,咩條件,一律唔來往。我真係無咁多時間比佢地浪費。亦唔想再搏。

講大話係基督徒嚴重既惡習,佢地為左令人覺得佢地正常,會騙你,話佢自己都有非基督徒朋友。(其實佢地長期接觸既都係團契,教會既人,當你同佢地熟左。你會發現佢地講大話。)

就算真係有非基督徒朋友,佢地見面比團友少。
總之同佢地相處,你要時時刻刻都懷疑佢,一齊越耐,會見到破綻越多。你會 100% sure 班人係癲既。

我有幾日真係信左神,由於誤以為果一刻既感動為「聖靈感動」。加上導師、團友既氣氛。當時一直都覺得奇怪,基督教實在太多野自圓其說,而且無法證實。又話要有足夠信心先會見到神,先會聽到神既指示(極之似國王的新衣)。直至睇左一篇離教見證:

和好多初信的一樣,我經歷了一種亢奮,覺得好像很釋放,滿足,平安和喜樂。大概在行出去決志時候我情緒洶湧爆發,激動的哭了,把埋在心裡面的不快發泄了。套用基督教的術語,就是所謂的「聖靈感動」。基督教裡面,其實對於「聖靈感動」根本沒有很清楚的界定,信徒求其有些 high ,感動、亢奮、甚至哭、笑,總之情緒表達,都好容易被歸入為所謂「聖靈感動」。聖經裡面講「聖靈感動」的部分,說穿了都是 heightened emotions,沒有所謂神秘的地方。

情緒的波動就好似一個巨浪把你推了去信。

然而,當我長大些後,我發覺這種感覺在不同的場合都會產生,就算不是信仰經歷也可以的。我朋友參加 Life Dymanics,感到被更新、重生,感覺和信耶穌的一樣。我朋友參加禪修,得到點化感動,感受內心的傷痛,也有這樣的反應。

以下既問題,從來都無一個滿意既答案:

神既生活係點?點解佢要做人做地球?神又點來架呢?我地係夏娃同阿當既後代,咁人類既祖先咪亂倫?

點解神要造撒旦出來?既然神係全能既,點解唔消滅撒旦?

話人類犯罪,所以用耶穌釘十字架代佢地死。既然神係全能既,點解唔立即抽走人既罪性?又話全能,又咁多限制?根本自相矛盾!

有一次上主日學,問個導師:點解d神蹟只在古時出現?耶穌將紅海分開。咁印尼海嘯果時,又唔見有基督徒祈禱,將大西洋分開?

跟住個導師話:當時有個基督徒祈禱,個浪就立即停左一分鐘,比佢走。

(都唔知係咪真既!無證無據。基督教所講既神蹟,一向都無證無據。不如全球直播基督教點去醫人啦! 咁以後大家睇醫生都唔使錢。但係基督教又話唔可以考驗神架喎,又話信心不足就無神蹟。嘩,咁現代人既信心比古時既人差咁遠架咩?)

簡直荒謬!尤其是用「風」去比喻有神,仲白痴!有風唔代表有神!


連結本網 離教者之家 2004-2016