離教者之家 討論區 | 離教百科 | 離教視頻 | 手機版 | Facebook 專頁 | 聯絡電郵 | RSS 訂閱
 
手機檢視本頁 | 简体中文 | 字體縮小 字體還原 字體放大 |

離教者見證

※ 撰寫你的離教見證 ※

主題: 加入此網 日期: 2006-04-14
作者: 巢巢 來源: 本網見證

兩三年前,就黎過呢個網,果時覺得只係有人頑固,唔明上帝既真理,所以先會聚集一個反基督既勢力。

一直以來,我都幾熱衷追求真理,覺得耶穌幾好,當然我都唔係話好乖好收心養性既教徒,但都係想向善既。

可惜,對其他身邊既教徒愈黎愈失望,具體上佢地無做d咩黎害我,不過,見到佢地d瘋狂行為,我會用「基督真理恐怖分子」黎形容佢地,亦可能係你地口中既邪基。

校園裡面,佢地成日以為自己咩都識,好熟聖經教訓,係一個基督徒圈子裡面想做最成熟最「聖潔」果個,但講既十為九之都係歪理(容後發表);鐘意五六個圍埋一齊聽詩歌,如果嘈住佢地,咁就麻叉煩,又話你唔尊重上帝(極其量我都係唔尊重人姐);更加激進既係祈禱黨,勁到連重安 windows 之前都要搵人同佢一齊祈禱,求神比佢智慧……

閒日一至五,幾乎日日有人要你參與祈禱咁濟,不過呢d好小事姐。如果知道邊個唔信,成堆人會好有愛心咁夾埋黎幫你,即係催你入教。

學校有團契返,佢地死拉死扯都會盡力拖你入去,拖人上契果d通常係恐基,最記得係一個恐基拖我去,我拒絕,佢就用勁溫柔加含情默默既眼神望住我講:「你唔可以咁架,耶穌愛你丫!」

自從我成功問到幾條恐基口啞,就開始有更多恐基盲基黎挑戰,最正係次次挑機失敗就叫我去搵宗教老師傾,依家你黎同我講道理定轉介我呢?不過恐基盲基都係人,我都好人道咁比台佢落,唔會再追問佢。

得閒週會堂又播下d感情催俗見證片,睇到d女同學喊晒,男同學乖晒咁睇,呢個時候敢傾計半句就死啦,輕則先生捉你黎插,問你識唔識尊重人,大則小息成堆人話你唔尊重上帝,唔尊重戲裡面個主角。其實最唔識尊重人果個係佢地,大把思維清晰既非基督徒,你係度要為上帝喊下,大家又要無端端陪你癲。

我自身覺得,一個宗教,要我地去「信」,唔係「完全明白」,只能夠憑感覺「信」既野,有某部分係唔合常理好正常,如果唔係點解要你去「信」姐?

聖經描述既上帝可能真係有好多難以理解既地方,外人睇可以話係錯處,如果你信既咪話「我依然相信上帝」囉,點解無本事為上帝辯解,都要強辭奪理去解釋?

解釋得到,就真係以理服眾,解釋唔到夾硬解釋,就係排他、思想封閉、自我幻想上帝,令人反感。

學校,老師同盲基同學(盲信耶穌乜都唔諗)好似夾定咁,狂灌輸「真理」。放學團契果日,唯一活動係返團契,唔比留係度打波,吹水,最多留係圖書館溫書;上週會堂,就算你唔信都要專心聽,否則當你搞事論,記名,好似假設左人人都信耶穌咁。

教會仲慘,因為我係教會唔多講野,唔係我內向,而係我同佢地真係唔熟,而且我覺得教會係寧靜既地方,想放鬆下自己。點知佢地話我無自信,逼我講野,有條友仲成日煩住我,滋擾丫,搞爛 gag 丫,猛開話題,乜都做齊黎聊我講野,真係關心到無微不至;仲成日搞好多遠遊聚會,我本身係唔鐘意去咁遠既人,跨區已經覺得好難頂,唔去佢地又群眾壓力,去我又勞役自己,真係救命。不過講返句公道既,裡面d導師牧師都幾肯講道理,聽落都幾岩聽,我之前一直堅持返落去都係想聽多d道理。

後來發現,學校裡面竟然有d開基老師和同學(心態開放既基督徒)。我一向都鍾意諗生死問題同研習下哲學,最經典係係圖書館睇《李天命的思考藝術》,曾經比個學校職員行過黎話:「李天命?超!」真係吹脹,咁睇尼采同羅素咪踢我出校?後來我開始覺悟,原來身邊d基督徒只不過係一堆迷信愚民,盲基恐基,實在忍唔住佢地。

漸漸,我做左好多脫教既野,宗教功課交篇質疑上帝既文章,傳道人回應叫我多d祈禱;得閒問下d盲基恐基宗教問題,笑下佢地d偉論,依家講一次佢地d歪理,有一次我問個盲基對話係咁:

我:上帝有無做靈魂比你?
盲:有。
我:你點知自己存在?
盲:咁我係有靈魂架嘛。
我:點知?
盲:每個人都有佢「精神上意志既一個靈體」。(類似係咁,個名詞真係好難捉摸,記唔到)
我:咩叫「精神上意志既一個靈體」?
盲:即係一個身體裡面既靈支撐住你個魂去維持你精神意志果個靈丫!(類似係咁,個解釋真係好難捉摸,記唔到)
我:解剖學發現唔到靈魂咩?
盲:你問咁多做乜姐,睇聖經啦。

呢個真係好經典既盲信例子,自從我用好水皮既能力去質疑佢地d歪理,就被人當係反基。起初我都唔知架,有次去 camp,間房門口出面,夜晚見到個男恐基坐係個女同學隔壁傾計。初初我都唔知佢地傾耶穌,以為個恐基溝女,過去八下佢地講乜,點知佢地傾緊耶穌,個恐基係咁叫我走,條女問做咩要我走,個恐基仲話:「佢反基督架!」

完全吹脹,係我既立場,到依家都係:

我覺得基督教係個導人向善既宗教,好欣賞佢咁著重「愛」,有好多經文關於「愛」既都好有道理,而且有d真係教你點做人。好可惜太多人盲基,自以為是,以為自己咁做就係好,逼人盲信。一如好多盲基果句:「錯既係人姐,唔係上帝。」當然我都覺做得上帝係唔會犯錯,而且都好明顯係d盲基錯姐。一個導人向善既好宗教竟然比d迷信者搞到令人反感,多得盲基。我相信自己唔係反基,只係反盲基。我自己好敬重d開基,佢地個腦真係有運作,想遵行聖經教訓,會反省、改進、思考,明白唔係基督徒都係人,肯聽非基既感受,呢種基我真係欣賞。

唔知我會唔會有信返既一日,但我肯定即使我信返,都唔會做盲基恐基,佢地d孤立利誘威逼對我係起唔到作用,我個腦唔係混淆,而係清晰、進取咁去思考人生。


連結本網 離教者之家 2004-2016