網站 | 討論區 | 視頻 | 手機版 | FB專頁 | 简体中文

使用者工具

網站工具


張繼聰

張繼聰

張繼聰(1979 -),香港唱作歌手,曾擔任童星,畢業於香港演藝學院,主修表演,共演出過20多套舞台劇。

張繼聰自爆脫離宗教

張繼聰今日出席商台活動以一身藍衣示人,並強調一身裝束是靛藍色,代表提升力量,又謂自己來自2013年,是要大家知道2012末日論是不盡不實。本來是天主教徒的他還自爆由3年前起已無宗教信仰,並稱太太謝安琪亦尊重他的決定。

難捨Kay:曾想了結生命

作為一個藝人,或者男人,究竟可以承受幾大的打擊?張繼聰可能是一個典型人辦。自05年出道跟謝安琪(Kay)拍拖後,經歷奉子成婚、寒酸擺酒、女尊男卑等種種批評,更被雜誌嘲諷為「廢柴」。結果,他得到了抑鬱症,他曾經認為無法解決問題,想將生命了結。人生的甜酸苦辣,他將一連五天在此細訴。

我的人生由三、四年前開始發生重大改變,記得07、08年左右,剛剛同太太(謝安琪)結婚組織家庭,當時已經有好多負面新聞圍繞住我哋,所以預咗之後會好難捱,果然真係遇到排山倒海嘅批評,因為當時太太同我都有宗教信仰,連一直覺得有宗教信仰人士應該屬較善良的一群,都一樣加入「攻擊」。

被指靠老婆養

由結婚後第二日開始睇到報道,我第一個反應:「嘩!咁嘅!列晒我酒席幾錢一圍。」隨之而來好多大大小小指控,真係寫得好Mean(唔舒服)。而且仲寫埋我太太,我認為太過分。比較完我同太太收入,又再講埋我屋企,阿爸同細佬都有工作有收入,講到我成家都要靠老婆養,點解要講到咁,我真係覺得對我屋企人好唔公平。

每次我一家人出街,門口就有狗仔隊跟,每次影完之後,我就知又會有唔好嘅報道出現,雖然每次佢哋影完都同我講:「唔好意思呀!搵食啫!」我明白每個人都有工作崗位,但真係次次講句「搵食啫」就得?你唔會唔知你哋將相交番去畀公司之後,佢哋寫完啲字,我會好唔開心,我都係一個人嚟o架!你識講為搵食,咁我呢?你哋依家搞到我都冇得搵食呀!

晚晚通宵寫歌

男人都愛面子,我更加係一個好要面嘅男人,以前我讀演藝學院好勤力,表現好突出,而且事業心好強,但唔明點解入行做歌手就會咁,我試過成年收埋自己不停寫歌,晚晚寫通宵,畀自己好大壓力,好辛苦,但對我嘅報道冇停過,呢種經歷連發夢都冇諗過,我就發現做乜嘢都冇用,當時覺得好灰心。

尤其係成為爸爸之後,令我更加對社會、對人性嘅瘋狂失望,我開始諗死啦!到我個仔嗰一代世界會點呀?人同人之間點解可以去到咁醜惡,而抑鬱症都係因為咁而開始。

呢個病係會控制唔到自己諗法同行為,每次行過報紙檔都好驚,心諗會唔會封面又係我,會唔會又見到自己個樣,你諗吓幾大壓力,試過一家人星期日去酒樓飲茶,對面搭枱嗰個人,打開報紙睇頭版就係我,寫嘅當然唔係好嘢啦!跟住佢睇完放低嘅時候就望住我,我當時尷尬到唔知點形容。

頒獎禮食定藥

最嚴重嘅時候,每次聽到我老婆唱歌,我都會好頭痛,呢段時間我完全唔會開收音機,好緊張,好驚聽到佢把聲,後來甚至連其他人把聲我都驚。

08年時候,我病情好嚴重,又正值係年尾好多頒獎禮,記得一個頒獎禮朝早,我出發前好緊張,要食定藥先去到。當晚睇到身邊朋友同老婆好好成績,老婆上台得獎,台下攝影機就拍住我,當時內心好矛盾好複雜,一方面好替老婆開心,同時又擔心,死啦!聽日肯定又畀人寫我好渣冇獎,然後又問自己嘅音樂究竟有冇價值,我係咪一個好嘅歌手?真係好痛苦、百感交集。

當時有病冇同過任何人講,一來唔想屋企人擔心,更加冇同太太講,因為佢都有同樣嘅病,當時佢都有好多負面報道,佢都好大壓力,我唔想加重佢負擔。而且當啲雜誌不停寫我好冇用,寫咗幾年之後我都開始質疑自己,諗張繼聰係咪真係咁冇用。

精神徹底崩潰

到09年初,當時我病情去到好嚴重階段,有一晚屋企得番我一個人,同期又有關於我唔好嘅報道出咗,嗰晚我花咗好多時間去諗,究竟我係乜嘢呢?我係咪真係好多人眼中嘅一條廢柴?我係咪一個一事無成嘅人呢?我係咪一個只靠太太嘅人呢?我咁努力都改變唔到人哋對我睇法,嗰一刻我真係徹底崩潰。

我覺得好氣餒,好攰啦!於是我有一個念頭,想了結自己生命,當時我打咗個訊息畀一位我最好朋友,同佢講我走咗之後,希望佢可以Take Care我屋企人,然後我做咗所有步驟,當時係好Emotion(情感)動作,當然我好唔捨得我屋企人,小朋友同太太,同好多好朋友,但我真係冇辦法,我頂唔住啦!

荒謬人生:情敵係陳奕迅?

一念地獄,張繼聰在重重打擊下,本打算以死逃避這醜陋的世界;一念天堂,終於他在一輪內心交戰下選擇勇敢活下去,並發掘到世界可愛一面。

正當我想了結自己嘅一剎那,腦內突然間閃出一把聲,問我點解一定要用死解決?其實你可以將唔開心放開,如果你想將自己一部分死去,係可以,但唔係用呢個方法,我解釋唔到當時屬於咩狀態。

由第二日開始,我發現對世界有唔同嘅睇法,亦好神奇地有段時間得到陳志雲先生賞識,喺電視台有好多機會,做好多主持節目工作,當時我諗莫非大難不死必有後福,唔通我真係可以吐氣揚眉?

殊不知一波未平一波又起,今次輪到我老婆同Eason(陳奕迅)傳緋聞,當然雜誌所形容嘅字眼梗係好差,我當時個反應係「我人生故事使唔使荒謬到咁極點?連情敵都要係陳奕迅?」安慰嘅係我同老婆感情冇受到影響,我仲識得自嘲,人一世物一世咩都試過,人生有咁都冇遺憾啦!

冇工開Hea住湊仔

緋聞過後,就到TVB嘅節目主持工作停咗,於是我索性留喺屋企做新碟,除此之外,只係每日接囝囝返學放學,即係大家所形容嘅Hea喺屋企,嗰段時間入面我睇咗好多關於佛學嘅書籍,開始改變自己諗法。我明白到老婆選擇將下半生交畀我,當然係覺得我好得啦!如果我繼續在意別人嘅睇法,就算連身邊所有人都覺得我得,我都唔會滿足,因為鍾意我嘅人永遠都鍾意,唔理解我嘅人我做幾多都冇用,由嗰時開始我決定為自己而生活,為自己交代。

「容納唔到咪轉行」

呢種諗法慢慢連老婆都受到影響,我明白到老婆比我當紅,大家經歷嘅壓力唔同,各有各難,一個男人要經歷咁嘅位好難,如果掉番轉我係當紅嘅,佢係家庭主婦可能會開心好多,佢本身就係想去教書,走去唱吓歌,點知就做咗女歌手,然後唱隻歌、行步路都要畀人評頭品足,呢個又係佢嘅壓力,但人生就係要掉轉角色先好玩。所以我都感恩佢選擇喺自己事業開始起步時候,同我結婚生仔,如果唔係大家有緣分,點會安排我哋一齊行呢條路呢?當我哋知道有小朋友打算結婚時有個共識,如果個樂壇覺得你哋兩個太過離經叛道,容納唔到我哋咪轉行囉!冇咩大不了!

有時諗番,原來唔經唔覺已經同老婆結婚5年,經歷咗呢啲都6、7年,當時覺得好大鑊、好驚嘅事情,依家回想番都只係過眼雲煙,冇咩大不了,有時自己都唔記得咗,仲有咩好介意!

冇自卑:老婆錢搵多我好多!

放低過去的張繼聰,透過書本啟蒙下,開始以全新的心態在人生和演藝路上重新出發,更出於惻隱之心開始茹素,慢慢成為朋友眼中的「張真人」,正如佛家所說,不經歷「入世」,怎能「出世」!

幾年前人生最低潮時,我收埋自己喺屋企,同時睇好多佛學、量子力學等大家統稱為New Age嘅書本,真係細心研究所謂2012世界末日,睇咗好多有關人類構造嘅理論!我喺呢幾年裏面讀嘅書仲多過讀大學嘅時候,啟發我了解另一種嘅生活哲學,一個人嘅時候我會打坐,因而頓悟到人生何謂快樂同自在,外人以為好似好宗教咁,但其實唔係,打坐屬於一種精神狀態,令自己冷靜、放鬆。

自從我開始改變心態之後,已經冇所謂順境、逆境,以前我好介意有雜誌報道我老婆搵好多錢,將佢身價同我作比較,依家已經冇再放上心,即使再有報道,我都當故事去睇。講真我老婆的確紅我好多,錢搵多我好多,但又如何呢?我唔會因為呢種報道突然冇咗隻手,唔會突然唱唔到歌,慢慢我冇咗憂慮,同明白何謂境隨心轉。

逆境學習有得着

我認為人生遇到所有事情,全部都有原因,正如佛家所講因果論,你所面對都係一種經歷,冇面對唔到嘅事情,即使今後遇到幾大件事,我都知道一定會有所得着,唔會去怨天尤人。

我其實好感恩曾經歷過人生低潮,我覺得依家先真正知道,人生咩嘢對我最重要。樂壇入面有咁多歌手,我係咪要做到好似Eason(陳奕迅)、基仔(古巨基)咁先可以過我嘅人生,有冇人有把握真係可以做到?香港七百萬人係咪個個要做首富先可以過快樂人生?如果係咁我會選擇過我嘅人生。

除咗心態之外,我連生活態度都有唔同,我開始食素,因為我反思到呢個世界好有趣,好多人口口聲聲話鍾意小動物,會養貓狗做寵物,但係又繼續食豬食牛,你諗吓係幾搞笑嘅道德觀!等於好多人講愛護動物,但又會去抽熊膽汁,所以我成日想探討吓,究竟邊個話有權力去決定殺邊種同養邊種動物。

屠宰MV遭「河蟹」

我上一張碟做咗首歌《瑪莉殺死小綿羊》,就係想講呢個問題,其實係好諷刺,我喺網上搵咗好多有關動物屠宰片段加埋首歌,剪輯成分半鐘長MV,結果畀YouTube「河蟹」咗,公司好多同事都睇唔到,我唔係刻意去挑戰道德觀,只係想大家反思吓呢個問題!

我3年前開始食素,老婆都因為同我睇法相同,所以佢半年前都開始一齊食素。雖然日常生活比較麻煩,所以從來冇逼其他人做,同住嘅爸爸媽媽會繼續食肉,而囝囝暫時係維持住一般人所講嘅均衡營養,所以冇食素,但等佢大個,我會同佢講呢個問題,然後等佢自己決定。

仲有好多嘢值得講

「香港沒有樂壇,只有娛樂圈」,出自二十多年前黃家駒的金句,套用到今天的樂壇,仍然相當應景!張繼聰對此十分認同,於是索性放開懷抱,以音樂為社會發聲,哪怕周圍充斥倒模式情歌,被認定為非主流!

香港社會外表好前衞,但其實好保守,做創作人好難,除咗情歌之外,講生活、講社會就會被評為非主流,其實好多人好受落。

由結婚到有小朋友開始,同太太都已經預咗隨時冇得撈,因為唱片市場無法計算,如果成日做咩都咁驚,我覺得好冇趣。偏偏香港八成半至九成創作人都基於咁樣去做音樂,結果大家鬥悶,做啲一樣嘅歌出嚟。

好多人會問我可唔可以做隻類似《天梯》或者《囍帖街》咁大熱嘅歌,但要唱紅一首歌要有好多天時地利人和配合,老實講,呢種歌每年樂壇都有八成半作品係咁,唱得紅係緣分或者係講運。

正因為好多嘢計算唔到,不如做觸動到自己嘅歌,我唔係刻意要走另類,即係唔單止愛情題材先觸動到人,仲有好多嘢都值得講,呢啲正係我最想做嘅音樂。

初出道壓力大

每年各大頒獎禮都有唔同金曲,以前個制度好戇居,邊個話一年淨係得十隻好歌?邊個話呢首最Hit?我覺得依家風氣幾好,大家各走極端,各有各選唔同嘅歌,先有多樣性。希望唱片公司都可以大膽啲,想辦法畀啲良心,做啲好作品出嚟,唔好呃人啦!

出道頭幾年覺得好大壓力,而且又正值同太太結婚,面對排山倒海嘅報道,真係唔易過。但自從人生觀有所改變,開始明白作為一個演員同歌手,如果每日都擔心今次首歌得唔得、有冇冠軍、唱片賣唔賣得、今年有獎下年仲有冇?咁會好辛苦,所以歌手唔應該選擇生活喺外人睇法之下,於是從上一隻碟開始,已經想同大家分享呢種價值觀。

否認標奇立異

香港有關音樂嘅報道真係得啖笑,娛樂方向比較多,而且自從結咗婚,大家對我注意力去咗我太太度,當然太太的確比較有娛樂性,所以瓜分咗我應該有嘅篇幅,於是我覺得要做番想做嘅音樂。上一張專輯,外人覺得我着套藍色衫話自己來自2013,又講世界末日,有樂評話我另類,但感覺最好。

依家做緊七月出嘅新碟,會自己做唱片監製,唱片公司畀好多資源去做,請到廣州管弦樂團合作,題材方面,會繼續講大家認為另類嘅New Age。其實冇特別話要標奇立異,只係同大家分享我嘅價值觀。

尋快樂:你好唔代表我唔好

生活何謂快樂?有人想升職加薪住大屋開名車,子女出人頭地成為人中龍鳳,這是普世價值觀,沒有不妥。但只有這種方式才快樂嗎?張繼聰就選擇用另一個簡單方式,尋得快樂!

成為爸爸後,最開心係望住囝囝一日一日咁成長,雖然佢仲好細,但已經好懂事,心智好成熟。我冇咩特別期望,只希望佢將來可以好似現時咁,好容易快樂,亦好鍾意同人分享快樂,生活富裕與否唔係最重要,但要做到呢樣嘢,今時今日喺香港真係唔容易,即使係大人都冇幾多個可以做到。成年人會覺得快樂同人分享咪好蝕底?呢個諗法幾變態,我平時教小朋友會話:「囝囝你玩玩具車,同人哋一齊玩啦,你有幾架,分一架畀人玩啦!」但現實啲人會話,又唔見你有幾架車就畀架人哋揸?其實呢個世界唔存在缺乏,你好唔代表我唔好。

小朋友本身冇大人呢種觀念,我哋為人父母都唔應該灌輸呢種錯誤思想畀仔女。想像吓,小朋友本身冇戶口、冇名錶、咩都冇,但佢哋幾開心呀!就算有時唔開心,但轉個頭就冇事,咁先真係活在當下。係啲家長逼佢哋入名校,讀精英班!

教育制度好荒謬

自從改變咗想法,呢幾年最大得着係做人開心咗好多,唔需要活在其他人眼光下,於是連幫囝囝搵學校都淨係搵咗一間,依家諗番,如果當時報唔到就真係死喇,我冇話要指定囝囝入咩名校,只係覺得呢間適合,讀唔到先諗啦!結果又畀佢一次考到。

根本現今教育制度好荒謬,佢要行精英制,個個爭住入大學,逼你做人上人。其實大多數書本上嘅知識你都用唔到,邊個會去計小數點之後三個位?你自己出去買嘢會唔會咁計?行出街會唔會指住地下問,你知唔知呢種石叫花崗岩?

人人天生完美

依家香港好多人生活喺恐懼中,好少人真正可以享受生活,大家從小被訓練到幾日唔做嘢就好似好罪過咁。但我唔係咁諗,覺得每個人天生都係完美,唔需要刻意做太多事去證明自己。但喺香港,人要做好多嘢先變得比較舒服,個個都要踩住人哋膊頭上,要去到所謂人上人先稱為有出息。就係社會結構出咗問題,例如選邊個做特首根本冇用,問題出在制度上。基於呢種制度下,大家永遠都唔會滿意目前嘅特首,大家鍾意過去式。講到尾,其實每個人都想生活得自在,人生本來應該就係咁。大家唔好再甘心做奴隸,可惜好多人呢頭講完,嗰頭又去炒樓炒其他嘢。(全文完)

後記:想到甚麼?

提起張繼聰,想到甚麼?「謝安琪老公」、被雜誌形容「不事生產靠老婆養的廢人」、還是「由頭藍到落腳自稱來自2013的怪人」?經歷種種後,張繼聰依然開朗健談,由音樂講到社會及政治,天南地北無所不談,最重要是他已放開以往的包袱,尋找到真正的快樂。

資料來源

  1. 蘋果日報,2011-4-11
張繼聰.txt · 上一次變更: 2013/02/15 22:24 由 admin