返回列表 回覆 發帖

[轉載] 不要驚動佢地嘅愛情

2013年1月6日
端木鳴
(原載於:《端木鳴輕甜日記》)

初認識女仔嘅的時候,一定會了解佢係咪hardcore教徒,如果係嘅話,一定縮沙。

所謂hardcore,即係嗰啲開口唔夠兩句就講教會,語氣聲調十足十創世電視啲人講嘢咁,覺得賭波同飲啤酒好壞嗰種。

唔係話教徒一定唔好,好多信教嘅女仔都不是那種hardcore女耶青,係可以交往的。咁點樣知個女仔係咪耶青?

咁首先當然係聽佢講嘢有冇佈道會feel啦,咩係佈道會feel?即係同成年人講嘢好似同幼稚園學生講嘢咁,你上youtube睇吓就會明。

除此之外,你同新識嘅女仔傾計,點都會問佢平時做啲咩咁,如果每個禮拜會返教會兩次以上,就肯定中。

如果你仍然要追,咁係你嘅自由,不過後果自負。

你追到女耶青,第一件事就係你嘅心思意念行為都要改造。你食支煙、飲杯酒,或者買場英超,當然係罪嘅奴隸啦。吓,咩話?你睇愛情動作片?響佢眼中你同等同殺人強姦了。總之全部都要你改。

親熱?sorry,如果我冇聽錯嘅話,你好似有啲嘢攪錯咗。你賣部iPhone返嚟,竟然問點解冇FM收音機?個設定本身就係冇架嘛。對於hardcore耶青嚟講,姦淫係極之嚴重嘅罪。唔好以為上床先叫做姦淫,根據佢哋嘅概念,你幻想同對佢上床都係姦淫。唔信?你上明光社個網站睇吓,佢哋乜都唔理,淨係理有咩3D三級片賣座、有咩報紙加甜,同埋同志有咩平權行動。響佢地眼中,你嘅性幻想大罪過共產黨謀殺民運人士架。



水抽完,講番正經嘢。如果你諗吓都係姦淫,你估你有冇得攬攬錫錫?

唔係冇,我識啲朋友,同個hardcore教徒拍拖,基本上係同修行一樣。拖吓手、錫吓嘴仔,就係咁。我有個朋友,用盡方法,又氹又跪,試吓多啲,試吓又多啲,好唔容易先由拖手進化到可以攬吓摷吓,點知個女仔之後喊,覺得自己犯咗罪。此情此景,真係乜都縮晒。

萬一俾你氹咗上床,分分鐘仲大鑊。佢同得你上床,當然係好撚大犧牲啦。佢因為太愛你,所以同你做,犯咗彌天大罪。你個責任就大到要養佢一世了。聖經裡面哥林多前書教導大家「與其慾火攻心, 倒不如嫁娶為妙。」

巴打,你個責任咁大,你仲唔快啲娶人?

你可能會話,唔係喎,黃貫中同朱茵呢咁?咁我問番你:你係黃貫中咩?朱茵似係嗰種教徒咩?



萬一,我話係萬一,你同佢做過而最後你地散撚咗,你就大罪喇。響耶青嘅世界,你呢啲仆街就係魔鬼嘅試探,佢就係因為你條仆街跌倒、墮落。好多女耶青覺得自己墮落,結果就更加縮,更加專注教會活動,我以前返教會都見過好多女孩子分享嘅時候講自己點樣俾仆街呃,而家迷途知返,仲有好多人話自己嫁咗俾耶穌(最多人聽過嘅就係阿GEM咁講)。結果,咁就一世。變咗教會剩女。

好喇,我知你好愛你個教徒女友喇。咁佢有冇成日叫你跟佢返教會?佢有冇講咩唔係基督徒唔可以結婚?有冇講如果咁樣落去,「信與不信不能同負一軛」(即係你唔信,唔會同佢一條心)?你跟佢返去教會,你就知死。當然,我都唔可以排除你會受感動,仲決埋志。總之祝你好運。

好多時hardcore女耶青係嚟自hardcore教會,佢地一來會要求信徒同番信徒拍拖,二來佢地多數會要求信眾響想拍拖之前祈禱一年半載「準備」。我估佢地既意思係,如果你祈完一年禱,呢條仔仲未搵過第二個,就真係上帝安排喇。跟住,如果你想同佢開始,佢就會堅持帶你返去見傳道、牧師之類。見牧師喎,are you ready?

如果你堅持唔信、唔跟佢番教會,結果佢就一係揀你,一係揀教會。如果揀你,如果佢唔覺得你係魔鬼派嚟拉佢落地獄嘅話,可能都好地地,如果佢真係咁覺得嘅話,你應該仲有排煩;如果佢揀教會而離開你,佢俾咗佢最珍惜嘅嘢你但你又唔肯悔改決志,佢就會覺得你呃佢,結論係你真係魔鬼嘅試探,佢又縮番入教會唔見人,重覆番上面講過既嘢。

個世界咁大,有好多選擇。雖然唔係個個教徒都係hardcore耶青,教徒都有好多係謝安琪、朱茵。

總之,如果你識個女仔嘅時候sense到耶青味,就唔該真係諗清楚先好上,免得累己累人。

http://www.vjmedia.com.hk/articles/2013/01/06/28201
返回列表
高級模式 | 發新話題
B Color Image Link Quote Code Smilies
換一個