抽刀斷水

陶傑原文：

有朋友問我對近日一個姓「肖」的大陸肥胖兒童在港非法居留又有書讀，有何意見？
一個肥仔，有何資格變成「社會公敵」？冰凍三尺，冇錯，這個小孩無罪，不過溫家寶說：香港有好多「深層次矛盾」。係好多自相矛盾的成年人有罪。
「肥仔大風暴」的焦點，係一個虛偽而又長期移動道德和政治龍門的所謂「建制派」---
1，當你講「公民抗命」時，佢同你講「依法施政」。
2，當你講白紙黑字的「基本法條文」時，佢同你講用隱形墨水另加的「基本法原意」，或者僭建在上的「人大乜乜講話決議」。
3，當你講「依法施政」、並提醒佢曾經話過「非法居留無證童不可以在香港入學讀書」時，佢同你講「弱小無辜，有教無類，肥仔都有讀書的人權」。
4，當舒淇被指在康城自稱台灣人而遭到大陸網民狂罵時，佢話這是「民意」。黃之鋒、林慧詩俾「愛港力」與網絡左毛狂罵時，又係「言論自由」。但網民紛紛強烈叫「肥仔肖」返大陸時，佢話咁樣叫做「網絡欺凌」。
5，佢話要「消除前英殖民地色彩」，郵筒改顏色，警察換制服，但前英殖民地留下的鄉村俱樂部，佢唔會剷除，高爾夫球場一切保留，佢自己同佢 D 姨媽姑姐用。你話唔夠土地起居屋公屋？佢話，可以「開發郊野公園」。
6，你在中學討論民主普選，佢話「唔好將政治帶入校園」。但佢叫校長教師宣傳「袋住先」，就係「國民教育，天經地義」；而 D 什麼西社團叫學生撐一個政治方案，錄影公開，交換去美國，則屬「個別事件」。
7，佢帶頭話「港人優先」、「港人港地」，當你也這樣講，你就係「港獨」。
8，佢叫你接受中國國民教育、母語教學、普教中；佢 D 仔女送晒去英國受英國教育、英教西 --- 當佢下令香港的中學每個學期強制要昇幾多次五星旗或參觀解放軍軍營加強國家認同時，不要忘記，他在英國讀書的仔女嗰間寄宿學校，十幾萬呎的操場，昇的是英國米字旗，英國寄宿學校參加英軍訓練營，個課程叫做 CCF。
9，佢話你「勾結外國勢力」，但佢個律政司或警方，一旦打大案，就會用你的公帑，由英國高價聘請英女皇御用大律師。
還有許多許多、許多許多。
香港特區十七年來，當咁嘅人 --- 如果佢哋仲 Qualify 係「人」的話 --- 不停狎玩着你時，一下撥款一千億，一下又話超支撥多幾百億，高官厚職，近親繁殖，樓價地價，火箭上昇。小圈子利益均沾。
但係你唔好反抗，要理性溝通。你理性問佢，佢冇反應。你大聲 D 再三追問，你冇禮貌。你攔住佢，再質問，你「激進」。
這就是香港特區的十七年。總之，佢永遠是對的，一切都係你錯。

https://www.facebook.com/tokit.channel/posts/879627745443083