Jom

去花旗 搵老細 偷雞唔到蝕咋米
有買錯 無買貴 獅子欏柚任人砌
暴利年代無王管 大條道理諗毒計
打開電視見金山 排隊買樓似擠提
歐美銀紙多過米 用完又印無問題
佢無錢時但有鎗 話知國債似崩堤
對住咁既大老細 賺佢錢要唔怕滯
何況向來雙獅猛 食飽一隻第隻黎
調動資源去番邦 點都唔係咁好睇
一句向股東交待 聽落健脾又開胃
本地銀行多婆仔 雞碎做埋都無謂
維港未見有石油 諗起增長就閉翳
樓價早已到晒頂 睇落無得點發圍
開得銀行非善堂 飲水思源係痴肺
一於執埋尐分行 得番一間至實際
話知週圍幾條村 又有老人又有細
各位存戶請記得 結餘唔夠就收費
須知人工舖租貴 招呼閒人無閒米
開戶前衡量是否 入得銀行咁專貴
唔係第時要攞錢 無車都要坐轎黎
你知一行幾個鐘 出咗人命就無謂
所以各位死窮鬼 唔馱諗可以入黎
除非官府照住你 攞到綜援咁有計
終於埋好個老本 伙拍花旗好兄弟
搭穚舖路去番邦 賺賺埋埋夠幾世
到埗買檔二叔公 貪佢養埋咋債仔
一去到就有錢收 年尾報告夠好睇
重有一班合作開 專收爛數古惑仔
萬事俱備就開始 張開大口吞咬噬
買賣按揭不必提 私人貸放供問題
無錢都重有間屋 話知要供幾多世
循環借完按上按 收入唔夠無問題
場市咁大回報高 少少壞帳無得計
而且一話無錢還 親切經理變打仔
收你屋時拆你骨 舂你心口舂你肺
呢頭花旗咁好搵 有人上門送錢黎
雷曼回報夠水頭 逄人都當係兄弟
推出迷債各產品 退休收息啱各位
獅子心知有鑊氣 利潤行先無所謂
迷債基金代理制 出事爆鑊無關係
總之出事客自負 搵個狀棍寫狀題
銀行兩邊收入旺 派息派紅樣樣齊
終於長升烋會爆 雷曼一野就瞓低
A記又話爆大鑊 幾間大行要歸西
花旗要出盈警報 歐洲又話況堪危
獅子知道呢鑊杰 笠水封咀扮烏龜
一路捱到過埋年 火燒春袋先度計
最後唯有要供股 十二供五攤到細
眼見唔少老友記 魂飛九宵魄唔齊
百四八十都要溝 最後五十都唔抵
重要撲錢陪蝕水 一手千六夾硬黎
仆佢臭街一大班 死都唔認屎忽鬼
又話大圍咁環境 又話美市唔聽駛
唔知以為阿布殊 係佢老豆刷鞋仔
政府出手好地地 扮晒有型話唔駛
大班個個有頭面 你死你事無低威
重要搵埋兩大賊 強質股東食山葵
供股俾人夾爆波 三十上落有眼睇
嚇到官府飛彈起 菁姨都要哭啼啼
最後大家無晒計 怕咗你先怕米貴
即時唔俾競價錢 輸打贏要好實例
而家重有一單野 中咗騙局被氹雞
唔知幾時先入帳 唔知幾時先會提
咁叉大間老銀號 出事唔聲正契弟
政府本來要睇實 任總剩識呢枱底
唔通要到閻王殿 至肯承認**錯西
恐怕五爺查一查 知佢糧準兼唔低
都會一時忍唔住 拖去凌遲墊屍底
香港奇景驚曠世 賤絕人寰五號仔