隔牆有耳：神父都搞鬼 萬聖節開 P
2010年10月21日
踏正 10月，鬼影幢幢，小芙蓉、辮子路、屋村女鬼……邊隻衰鬼最驚嚇？八方會答：神父扮嘅鬼，包保驚嚇過海馬公園同迪迪尼。
莫非真係道高一尺、魔高一丈，點解神父都要「淪落」到扮鬼？噚日八方收到聖堂朋友仔邀請，約去參加「猛鬼出街」，張海報青 BB，講「鬼」嘉賓除咗喺電台講鬼故事嘅雲海、扮龍婆扮到深入民心嘅女演員羅蘭，居然仲有天主教香港教區秘書長、專門負責驅魔嘅李亮神父同埋禮儀委員會嘅羅國輝神父，舉行地點仲要係天主教善導之母堂，唔通真係猛成咁？連聖堂都鬧鬼？
有感後生仔會好奇
平日細膽嘅八方睇到當然「巧京京」，即刻打電話去問搞手阿祖做乜咁大膽，阿祖本身係 903DJ，又係教友，佢話喎，教會與其唔畀人玩萬聖節，不如趁機會講吓到底係咪真係有鬼，同埋如果有鬼應該點處理，所以決定喺 10月 31日晚搞呢個活動出嚟應吓節，到時四位嘉賓會一齊研究吓靈異事件，之後仲會開萬聖節 P㖭！
咁好嘅橋，到底係邊個諗出嚟？始作俑者原來係羅神父，唔好以為羅神父平日搞開禮儀會好古板，其實出名古靈精怪，佢話個活動係即興諗到，原因係後生仔喺呢啲問題上有好大好奇心，值得傾吓；嘉賓之一羅蘭本身係虔誠天主教徒，都擔心個活動會唔會導人迷信，不過羅神父拍晒心口話冇問題，只要唔影響信仰生活就得，仲叫大家記得扮鬼扮馬去，結果好多唔係教徒嘅都報名。
神父講笑照鏡見鬼
佢仲解釋，其實萬聖節源於歐洲，當時有為亡者布施糖果嘅習俗，收到糖嘅人就答應為亡者祈禱作回報，慢慢發展落嚟，就成為小朋友到處敲門要糖嘅傳統。至於萬聖節嘅起源，就同愛爾蘭民間傳說，同埋天主教會 11月 1號嘅諸聖節、 11月 2號嘅追思已亡節有關。
見神父講到興致勃勃，八方乘機問神父有冇見過鬼，佢話成日都見，朝朝照鏡都見到；咁活動當晚羅神父又諗住扮乜鬼呢？佢答：天主。
http://hk.apple.nextmedia.com/te ... at_id=45&coln_id=20 |
2010/10/17 18:32
| 
