返回列表 回覆 發帖

與教友暢談宇宙終極真理#3

12月25日節, 我被強制性誠邀往某弟兄府上大食會。
我生性沉默寡言, 佳節期間眾人對近日美國佬狂印銀紙大發議論, 我當然不屑好似佢地咁事奉瑪門, 於是行行企企, 發現弟兄書架上有本【聊齋】。照理, 弟兄冇理由會對【聊齋】有興趣, 所以我估計應該係弟兄信主之前買落, 如今又費事dump咗佢。為了印證我的理論, 將之取下來睇下有冇寫住「某某某購於某年某月某日」, 有尐人買書會自己寫上以上record以示風雅, 咁只要找個藉口打聽一下弟兄何時信主, 就可以proof 我的理論了。

正翻閱時弟兄見狀問曰:聖誕節大家咁高興, 沙文你做咩扮cool 係度睇書呀?
見佢盛意拳拳,我亦不妨放開心懷同佢真情對話, 我話, 【聊齋】啓發咗我一尐嘢,世界上所有人都係以立場來决定觀點嘅, 粗俗尐講, 即是你個羅柚所坐的位置决定咗你個腦諗尐乜嘢出來;譬如, 你生為中國人, 就一定認為尖閣列島係中國領土, 你一定唔會認同0架仔對此島之睇法,以及, 日本仔打中國, 一定係侵略戰争。

另一位弟兄聞言大怒, 問我:乜唔係咩?

我又從書架上找一本歷史書, 找出一張畫:



我指住張畫問: 呢位邊位?  佢話亞歷山大大帝, Alexander the Great

我話, 點解你又唔話亞歷山大打歐亞非3洲打到去摩囉叉係侵略, 你仲要話佢偉大? 可見你對中日戰爭的觀點係由你中國人的身份而來嘅。

此時其他弟兄姊妹加入圍觀, 有人問起何以我們會談到這個話題, 於是原先的弟兄講解了一下, 有人儆醒地問:沙文講得雖然很有道理, 但同【聊齋】究竟有咩啦lung呢? 由【聊齋】點可以推論到「立場决定觀點」呢?

我話, 梗係得啦, 嗱, 你諗下, 點解【聊齋】入面嘅女鬼、狐仙, 專門係要鍾意尐壞鬼書生嘅呢?

有人就諗起「倩女幽魂」, 因為書生好似張國榮咁靚仔, 但又有人話「凡書生必似張國榮」係邏輯謬誤, 可見基督徒都未必一定唔識邏輯嘅。但終於都找不到一個公認的解釋, 於是眾主內弟兄姊妹要求公主吩咐我開古。

我話, 好簡單, 因為【聊齋】根本就係壞鬼書生自己寫0家嘛!

佢地聽後大笑, 話:沙文你講得啱得黎仲好盞鬼。

我話:你地都覺得我講得啱哩? 佢地仲未笑完, 淨係猛咁颔頭。
好嘞, 你地可以話我聽, 點解上帝要揀猶太徒做選民嘞。

正好應驗了經上記著說「從此以後、沒有人敢再問他甚麼。」

連公主都唔睬我了..............
笑死~
支持鼓勵每位離教者
開大食會一齊敬拜瑪門……哈哈
咁可以conclude宇宙終極真理#3係咩未?
支持鼓勵每位離教者
慘...沙大哥以後幾廿年聖誕大餐都冇著落lu
當年毛主席曾作文探討「槍指揮黨定黨指揮槍」
我諗稱之為「屁股指揮腦袋定律」
可作為自由意志的詮釋:您嘅意志有幾自由, 其實係由您個籮柚决定嘅
de omnibus dubitandum
返回列表
高級模式 | 發新話題
B Color Image Link Quote Code Smilies
換一個