老耶開大會,叫齊所有天使埋位,一開波就話要佢地除咗管理晚舞既時段外(天堂),重想佢地全組人做埋茶舞(人世).
大班阿加二話不說就將隻腳戙上枱:"老耶,你咪以為我地唔知.茶舞班友又咸又污糟又無文化,一時又話要洪水沖身,一時又話要大開殺戒,厭惡性部門喎.做唔係唔得,但我地而家齋做茶舞都夠食,你開到個乜野盤口俾我地先?"
老耶面有難色:"但係你地都知你地晚舞因為member only,入場又貴,又唔送果盤又無色情成份咁,好多年都無增長喎.你知啦,家陣乜都講資源增值,再係咁要cut你地head count喎."
阿加聽到就更火上加油:"我挑!咁鍾意食生果就返屋企種,呢度係成人遊樂場.要色情成份咪去街囉,無野收又要俾人搞,我不如返屋企對住老公算吧啦,駛返黎開工?你估車錢平呀?"
老耶心知不妙,突然眉頭一縐,計上心頭:"不如咁啦,你地做開一晚六千年命,咁啦,full package茶舞連晚舞兩次六千年命,但唔駛做足十二粒鐘,做九粒算啦,比起而家都係做多三粒鐘啫."
"你唔好傻啦!"阿加不屑,"你估我命少得過你咩?我一晚出一次街都多過你出糧俾我啦,真係等你果份就米都有得乞呀.咁啦,一係以後街鐘代支全部歸返我地,咁都重可以同你捱多兩粒鐘既.但講明先呀,我地無特別服務架,咪一陣又水又火咁我地唔做架.你身賤咋,我地唔係呀,如果真係要做既你自備皮褲親自上陣呀."
老耶聽到呢度,不由得左手抹汗右手揞住往面既出入口:"...我唔得架大姐,上個世紀我後面恆星大爆炸熱氣到而家呀,大夫話我個瘡仲有六十億年發熱發亮呀.而且你地係街鐘數先係我呢係既主要收入喎,你地收返晒我就係齋食西北風,食得多唔掂喎."
"你唔得就係人都知.咪扮野啦,"阿加更不屑,"原本茶舞個大班阿路路(Lucifer)因為串你擔唔起你就吠人,結果佢就拖埋成組人去開第二度,我鬼唔知你家吓疴碌夾碌咩?果度差唔多成個聽既三份一人架,而且佢地又爛做,歌又精舞又勁,就算你叫我地頂住大家都唔同瓣數啦.我地賣個殼,佢地賣功架,點頂呀?"
老耶心知阿加講既係事實,但又直係無計可施,一時間都無晒主意.
"你咁七點做大架?"阿加串到佢暈"仲話做話事人,做阿頭唔係咁做架,我做阿二都唔得咁啦.嗱,咪話唔幫你,見大家同一個單位我都唔想你死.改改佢啦,將茶舞改為金魚缸,將個場係茶舞時間整到有咁黑得咁黑,再出去買個細細地既缸返黎,擺幾件落去,搵盞spot light打落去,加埋幾塊反光板,咁就幾醜既都幾到飯得杯落啦.另外,我知阿路路係出面都唔係幾掂,我幫你叫佢扮野改過個名返黎插飛,以前既野咪當粉筆字抹咗佢囉."呢位阿路路,後尾就改咗名叫旦旦,成為咗呢個金魚缸既第二把交椅,繼續日日去串阿老耶唔得.
老耶聽到咁眉頭一鬆,但又諗起另一個問題,"但做金魚缸...唔夠人又唔夠budget買燈買反光板喎."
阿加無晒氣,"用吓腦啦pk,你個腦用黎坐既咩?定係裝屎架?無人咪求其做幾野出黎囉,樓吓裝條緊有紅毛泥呀.燈...用你個瘡囉,頂到六十億年都ok啦,做住先,到時做到數咪叫上面加budget囉.反光板重簡單,我呢道有串石仔錬,你拆開佢舖開咪得囉.用吓你個死人腦啦,你份糧無分俾我駛架!點呀?而家掂啦!徒我時間,弟兄姊妹,我地閃!"
阿加走咗,老耶因為有辦法交到差而滿心歡喜,落樓下攞咗少少紅毛泥,就諗住整幾個人出黎,點知原來都好難整,又無model,就只好跟住自己個款整啦.整咗先醒起無女...紅毛泥又用鬼晒,無辦法,唯有係個男度攞少少泥出黎加多D水搓個女既,為咗報跟手要日日同有牙齒印既路路合作時又要再睇佢面色,就將個女既造到路路咁既樣,重要日日俾個男既插...
終於,個茶舞金魚缸開幕...
"創1:1 起初,神創造天地...." |
2008/1/18 21:00
| 
2008/1/25 03:14
| 
, 
2008/1/23 16:10
|