|
 
|
報佳音：一個犬儒觀點
「陳傳道，今年我們搞不搞報佳音？」
「點解要報？」
「因為報佳音是向人傳福音呀。」
「低能，在街頭唱歌和傳福音，是兩碼子遠的事吧。」
「但我們要在社區作見證，所以要向他們報佳音。」
「平時你唔做？」
「聖誕節嘛，告訴他們耶穌基督降生。」
「老老實實，除左d新移民，香港有咩人唔知聖誕係紀念耶穌降生呀？」
「係，但係聖誕既意義被商業取代，有人以為聖誕節係紀念聖誕老人嘛。」
「fine，咁你去報佳音，係點報呢？」
「嗱，我地會去我地堂會附近的地方，向d街坊唱聖誕歌，然後同佢地講『耶穌愛你！』」
「就咁？又話傳福音？」
「我地有諗過做dd個人佈道既，但係平安夜報佳音想多d人參加，又有d人一家大細，大家又無乜訓練，我地唔想咁 side tracked，所以主要都係唱歌，想祝福社區。」
「咁你講清楚，係想傳福音定祝福社區？」
「報佳音，咪祝福左個社區囉。如果有人有興趣，咪同佢介紹教會，同傳福音囉。」
「具體來說，祝福左個社區d咩呢？」
「佢地聽到福音囉。」
「錯。聽到你地唱歌，唔等如傳到福音。」
「咁呢d係教會既社區見證丫嘛。」
「講清楚d，點樣係社區見證呢？」
「有教會係社區報佳音，d舖頭都好 welcome 我地，又有人停低睇，d人睇得好開心架喎。呢d咪教會向外作見證囉。」
「喂，如果劉德華黎呢頭拍戲，d舖頭仲 welcome 佢，更多人會停低睇，d人睇得仲開心喎。咁即係點呀，你當街頭表演係教會見證呀？」
「唔係，咁我地想社區認識我們嘛。」
「again，點解平時唔做呀？點解要趁平安夜呀？」
「因為我地不嬲都有報開佳音，大家都報得好開心，咁咪搞囉。你問咁多做咩嗟？」
「即係咁。嗱，你當我係傳道，問我搞唔搞，我就照直答。我一開始就問一個最 fundamental 的問題：點解要搞？你答左我幾樣野，樣樣都好似有道理，但係我就覺得你地係為搞而搞，唔搞唔安樂，係為左自己的安全感而搞囉。你既然講到自己係要作見證，其實你係咪要諗下呢個社區其實需要d乜？要同社區連結，靠咁樣一年一劑報佳音，係唔 work 架。你要做，就平時做，咁樣係平安夜晒馬，會唔會只係自 high 多過為他人？為甚麼要報佳音，這是最根本，也是最重要的問題。」
（後記）
事有湊巧，或是出於聖靈感動，在下出 post 一會，就看到 BT 兄的一幅相。相中一班信徒對住「空氣」報佳音，卻不上前關心露宿的婆婆，畫面極為諷刺。圖片引來廣泛討論，有些人和在下觀點相若，不喜歡這種「自 high」式報佳音；有人則對報佳音人士較為仁慈，認為報佳音也有價值，是聖誕的傳統活動，有也無妨，總好過無。在下堅持一點，要做，就要知道目的，目的是為了社區的話，就要從社區的需要著手構思，不要為做而做。
http://chandoremi.wordpress.com/2012/12/25/1-573/ |
|
2012/12/26 22:43
| 
2012/12/28 14:31
|