燈罩的背面，係最黑暗o既地方

信主為我的救贖，已經有3年有多喇。日子雖短，但體會很深。今日的理智告訴我，我已經失救了。

太多事令我感失望：

 
1. 聖經的失實，前後矛盾，世上的災難太多，上帝耶穌的言行令我覺得佢既邪惡，很恐佈，佢一個海浪，唔理好醜，但求就手，連信同唔信佢既人類都殺埋；佢全知全能就唔知係考驗定係折磨日夜祈禱的異國饑民；佢引起戰爭，令國打國，人打人，以吻合佢編寫既聖經劇本內容。佢鍾意點就點，把口就話愛人如子，行為上就刀刀桶人心口，我深感恐佈。
 
2. 教會的背後黑暗充滿階級主義與權力鬥爭，為左一Ｄ小事，可以借題發揮，教會只係滿足人既統治別人既慾望既工具。
 
3. 教會與教會表面同盟，實質互相搶奪人數，策略定下目標向無知的新移民埋手。
 
4. 牧者、傳道人的見證大話連篇，妖言惑眾，利用兄弟姊妹的無知擴充自己的野心，巧立名目大量騙取血汗金錢，記得有一次，一個傳道人離譜到用馬太福音耶穌講既：我o黎係要令你地家散人亡講經，令我呢個係中國傳統思想長大既小朋友最反感，深刻思考主o既神格，果刻我心諗：天堂我唔要喇，我寧願下地獄喇。
 
5. 教內的兄弟姊妹表面相愛，實質充滿鬥爭，沒鬥爭也充滿小圈子既偽善，背後被說壞話中傷，不知出現左幾多次。有錢靚仔永遠受歡迎；樣子難看學識低o既永遠都係被欺壓利用既一群。
 
6. 只要懂得演戲、克服良心、講Ｄ甜言蜜語，你就會受到虛偽的歡迎；默默的付出，真誠信主既弟兄通常只係待宰既羔羊。
 
7. 只要與信教的男女朋友分手，之前講得如何堅決信主的兄弟姊妹，都唔會再出現教會，都唔會再信主。
 
8. 兄弟姊妹對已離教的兄弟姊妹人情冷暖，世態炎涼。話知你同佢有幾年相識每個星期曾經共事７日，當你無番教會，如同陌路。離譜Ｄ既，小弟試過向跟進弟兄關心離教弟兄，得出佢咁樣既會答：「唔知佢呀，其實佢行為都怪怪地，有Ｄ問題o既……」當時真係小弟有Ｄ……

以上種種事，我都深切體會過，我信o既，唔係佢地口中o既異端，而係佢地所謂o既大教會o既支教會。

我又唔能夠以偏蓋全，可能真係有好好既教會也說不定，但係我點都唔會再信基督，因為我好肯定佢係一個局，一個騙局。

有Ｄ教會，掛住教會o既名，講白Ｄ，其實就係有牌黑社會。

「教會」只係一層羊皮，可以話比出面o既社會更虛偽，更難入目。

當初帶我入教信主的同學，現在已經離教了，昔日的種種在團契生活的日子只是一些虛假的幻象。

現在回想起，我真為過去的狂熱、出錢出力、真心信神及強行抑制自己的理智而感到無知可笑。

老實說，我也曾誤認理智為是否受撒旦的試煉而掙扎過，但我心中的理智戰勝了真正的惡魔，我感到恩喜，看過一篇「阿傑的故事」的分享，我更加知道原來有很多與我曾經熱血過的朋友存在，此刻我想分享我失救的解脫喜悅，支持更多在地獄邊緣既朋友回頭是岸。

如果閣下符合下列的要求，無錯，今後你們將會得到大喜樂，因為你將會失救，只係時間既長短唔同咁o者：

 
1. 對人生問題充滿熱切求知慾，而且對傳道人發問過深入尖銳o既問題，Logic太強，學富五車，愛接納世界各方面既意見，愛批判學習；
 
2. 不喜出風頭，默默付出，做人低調，樂於助人，內心善良既朋友；
 
3. 朋友可能奇貌不揚，或是身體傷健，但是內心善良，真心分享既朋友；
 
4. 搵緊大錢而又表面無腦，實質內涵豐富、有分善惡能力既朋友；
 
5. 真心信主，信奇蹟，充滿理想既朋友；
 
6. 入世很深，內心堅強，為左得到宗教o既力量得求一官半職及為子女謀得名校o既朋友；
 
7. 因為想入教溝仔溝女而表面信主；
 
8. 因為溝仔溝女溝到手而表面信主的朋友。
    

有以上徵兆既朋友，唔好諗咁多，請即刻離教，（特別係「目的」６－７既朋友，因為你地只會為無可能o既o野付出緊，你地唔會有咩結果，唔好浪費你地既寶貴光陰喇）

唔好擔心咁多，離教啦！

唔使因為自己受浸或決過志，而覺得自己離教不守承諾，因為人地有心整個騙局比你享受，你無必要遵守咩o野承諾。

唔好克服自己既理智喇，朋友，唔好依戀咁多，虛偽既人際關係，只係一場霧水。

你會發現你會好自由，因為今後既人生係屬於你自己既，你會有很多發展空間工作順景，困難得到解決，因為你有好多時間考慮解決問題既方法做有意義o既事。

同時我想勸一Ｄ未入教o既朋友，諗清諗楚先好入會，唔係你會好後悔。