離教者之家 討論區 | 百科 | 文庫 | 視頻 | IG | 手機版 | AMP手機版 | 聯絡電郵 | RSS 訂閱
 
AMP手機檢視本頁 手機檢視本頁 | 简体中文 | 字體縮小 字體還原 字體放大 |

離教者見證

※ 撰寫你的離教見證 ※

從基督教到吸引力法則

日期: 2016-11-09
作者: Wei Feng 來源: U-nique Law Of Attraction

(WARNING:以下只係我個人感想,冇任何中傷任何宗教既意思)

你有否懷疑過主?

幼稚園既時候,我就已經相信主。我覺得只要祈禱,就會得到想要既野。信既原因係,我幼稚園係讀基督教學校的,每日都要祈禱,又要成日聽聖經故事,所以潛移默化左。

所以我每日訓覺前都會祈禱,內容都係我想得到既野。過左段時間,我祈禱既內容愈黎愈多,時間由每日1分鐘,到差唔多6 – 7分鐘。

因為我諗,如果真係好似教我既人咁講:祈禱就可以得到我想要既野的話(or 可能得到的話),咁我不如大包圍,任何大小願望都唔放過了,最緊要唔好蝕。(包括希望聽日起身唔好咁眼訓,但當然我每日都眼訓到要o係學校訓覺)

慢慢我發現,點解我既wish list愈黎愈多,冇咩減少過?係因為我既願望多到離譜?定因為冇咩願望有實現過 ?

你會否厭惡祈禱?

我唔知其他人係點。但當我到小學,每日訓覺前祈禱時,都有一種「唉……又要祈禱……」既感覺。

祈禱好似已經變成我既責任,已經唔係因為我信主,所以要每日同佢溝通;而係因為我祈左咁多年,如果而家停左,萬一佢本身諗住聽日幫我實現既話,咁我咪蝕到仆X?

但再過多幾年,都係冇咩願望實現過時,我就開始覺得厭惡,好似我每日都係對住枝火柴,求佢俾野食我咁--發緊夢

仲有一個問題:

每次祈禱既時候,我都會有種好唔耐煩既感覺。好似好心急,好需要我既願望即時實現咁。

而且,好似如果佢聽日都唔實現既話,我就會好想鬧主:做咩你仲唔幫我嫁?你唔係想我上左天堂先親手俾我丫?我X你丫?(唔係對基督教唔尊重,只係表達我真實感受過既心情)

慢慢地,我從祈求,變成命令。

例如:我想要果樣野丫,你快D俾我啦唔該。我求左你咁耐,你都唔理我,你究竟想點姐?(again,唔係唔尊重,只係複述我真係做過既野)

你有否對主失去過信心?

終於有一日,我決定放低晒所有既願望,除左一樣野(唔話你知係咩,你吹咩)。我決定以後都只會求依樣野(因為果陣我真係好想要),因為我唔想再嘥五分鐘同空氣講野了。

果日起,我都係處於一個認為基督教係假既心態下,繼續向「主」祈禱

(正確黎講,我唔係向主祈禱,因為果陣我已經唔再信主了,但我又唔知一開頭唔講:「主耶穌,我請求你」,仲可以講咩。如來佛祖?觀音菩薩?孫悟空?孫悟飯?孫悟天……?布……歐……?咦……等等……?)

Anyway,我講就講「主耶穌,我求你」,但其實我個心已經唔係向主禱告。我係向一樣連我都唔知係咩既野禱告,就好似對住空氣祈禱咁。但唔同既係,我就係覺得將會有樣野會幫我實現的。

新的祈禱方法?

用左一個好特別、而且我從未試過既方法對住孫悟空祈左兩個月禱後,個願望真係實現左。當然果陣我仲未知咩係吸引力法則,我只係覺得:咦……真係實現到喎,正丫!

之後我每次想要依樣野時,我都會繼續用我自創既方法去祈禱。

但當我認識LOA(本網註:吸引力法則,Law of Attraction)後,我發現我唔係依個方法既始創人(但其實都仲有小小野真係我自創的,而且都幾有效)。

我既祈禱方法會係日後再講,畢竟今次既主題係孫悟空……no……主耶穌先岩……

從基督教到吸引力法則

到我2014年接觸到吸引力法則後,我回想左陣,先發現原來我以前一直都不自覺地運用緊LOA去得到我想要既果樣野。

如果我可以一早發現咁樣祈禱係咁有用既話,就唔駛一事無成左咁耐啦(雖然而家都係一事無成……)。

Anyway,就係因為「由我向主祈禱、咩事都冇發生、到我向孫悟空祈禱、好快就實現左」依件事,令我完全離開基督教,而相信吸引力法則的。


連結本網 離教者之家 2004-2024