離教者之家 討論區 | 百科 | 文庫 | 視頻 | IG | 手機版 | AMP手機版 | 聯絡電郵 | RSS 訂閱
 
AMP手機檢視本頁 手機檢視本頁 | 简体中文 | 字體縮小 字體還原 字體放大 |

離教者見證

※ 撰寫你的離教見證 ※

ATHEIST FOREVER

日期: 2004-04-26
作者: TrustFull 來源: 本網見證

拿,唔係同你講笑,我讀書少,所以我講野粗俗冇禮貌,唔好怪我。

係你繼續讀之前,請你搵下你屬於以下邊一類:

  1. 無神論者-包括正無神論同負無神論,英文係 Positive Atheism 同埋 Negative Atheism,Negative atheism 亦有人叫 Agnostic,即不可知論者。-請你繼續讀啦…
  2. 基督徒(下稱基佬)-信神o個種,話知你乜教乜門派:基督教,天主教,摩門教,浸信會…等等。假如你宜家係基o既,亦應該分為兩種:
    1. 想睇我有幾廢話,睇完之後都係會繼續祈禱,認為我死後會地獄BBQ--對唔住,假如你係好篤信神o既話,對你o黎講,我以下所講o既都係廢話。你可以宜家移個游標去呢個視窗o既右上角,按X,咁樣你o既人生會多返好多分鐘,你可以用o黎做 D 對你人生更加有意義o既野,例如:傳道,祈禱,讚美神,讀經…等等   
    2. 你睇係因為你對耶穌/神(下稱穌哥)有疑惑,但你又唔肯定。-請你繼續讀啦…
  3. 其它教-對唔住,你並唔係我呢篇野o既對象
  4. 其它-我信ET/董伯伯…等--對唔住,你都唔係我呢篇野o既對象
  5. 唔知-咁你又點會o黎到呢度啊?

不過呢,其實俾邊個睇都冇乜所謂…


我宜家二十歲,做過十年半「羊」,睇番轉頭真係唔明自己點解會咁低能,你可能會諗,我先得廿歲,仲咁後生,得咁少人生經驗,所以先會離教o者…

我認為我信神o既其中一個原因,係因為我小時候缺乏對宇宙萬物o既認識。但係當我上o左大學,識多o左人,學多o左野,加上互聯網o既普及,我先發覺人類o既渺小。

所以,假如有位人兄同我講,有位萬能阿生好鬼死得閒,又鍾意玩泥膠,又有好多愛,要人挽下佢對鞋(英文:kiss his ass),所以整o左我出o黎。如果我生前唔信佢,佢會等我屎o左之後就燒我老簿…我諗咁樣o既廢話真係只可以用o黎呃靚仔。


我o既屋企係無神o既,雖然有阿爺o既神位,但係我阿爸阿媽好開通,佢俾我自由去揀我想信o既o野。

我返o既幼稚園係基督教,小一至小二係基督教,小二下學期至小六係天主教,中一至中三係天主教,中四至中五係冇教,之後o黎o左美國讀大學。

我諗我小一至小三o既時候重係度拾下拾下,都唔知乜係宗教,穌哥係啊水…

小四開始要上聖經,又要去個小學天台o既小聖堂度一齊祈禱,宜家諗番起先發現小時候被洗腦o既威力。

冇記錯o既話,我係小四開始睡前祈禱,打後十年都係咁樣。

其實我o個時都唔知我信乜教,淨係知道信穌哥佢會打救我,咩係打救啊?唔知呀,上天堂啊?

上到中學,又要讀阿水整o左隻大木船,話要去玩大航海時代,阿水又斬開個海,分成兩邊…o個間中學都夠毒囉,週會玩祈禱(真係變態,罰企之餘仲要俾人洗腦),個個禮拜都要上Chapel(中文好似叫禮拜崇拜)。

我仲記得中一同中二有去學校團契,哇哇哇,又洗腦啊!!!

之後中三貪得意,跟同學返一間教會o既團契。

其實我o個時開始有疑惑,覺得我自己同自己講o野。加上我開始討厭人地話我知我應該點諗o野…

不過,我都仲係有祈禱,直至我o黎o左美國一年半,我決定俾我自己一個挑戰,我係二零零三年開始冇再祈禱,我希望我用呢一年o既時間去探索呢一方面o既資料。


但係咩事會令到我去挑戰我o既信仰呢?

我二零零二年聖誕節去o左我係洛杉磯o既表姐度住o左兩個禮拜。我表姐同佢老公好積極參與一個華人教會,我睇到佢地o既全心奉獻,冇論在金錢上、體力上,都係為教會。我好感動,我都唔能夠明白佢地點解可以咁忘我。由於o個時係聖誕節,個教會有好多活動,表姐亦有帶我去,但係佢冇強迫我去。

其中一個係一個傳道會,講者異常權威,佢叫 Dr. Yan(顏重剛博士) (http://www.truth-monthly.com/issue89/0102mt01.htm),你可以去個網度睇下佢有幾叻…唔係講笑啊,佢係雙博士,係啊,雙博士啊!!其中一個係 UC Berkeley(加州大學柏克萊分校…勁有名)o既遺傳學博士。

但係佢點叻都好,聽過佢 D 偉大理論,我至發覺佢係一個白癡…LOL (Laugh out Loud!!)

好o肋,咁佢講過 D 乜呢?佢首先講我地有靈魂,哈哈哈哈哈^(無限次方)

佢用 D 所謂科學解剖o黎証明人有靈魂,哇,佢真係應該再讀過小學科學,咩叫Observation,Hypothesis,Experiment,Theory,Law 都搞唔清…佢又話我地冇靈魂會點會點…係度,我俾四個大字佢>>> 妖‧言‧惑‧眾

佢「証明」o左我地有靈魂之後,佢就話,我地屎o左之後,雖然身體會腐化,但係靈魂會常在,所以個靈魂會去一個地方--就係去見阿萬能阿生啦!佢會話你知你去地獄BBQ定係上天堂…

靈魂之後,佢嘗試去証明進化論不可行,佢話係咁短時間內機率無可能將無機變有機,單細胞變多細胞,然後變爬蟲類…最後到人類。

我係呢度要反駁下佢先啦…如果你信地球有大概四十五點五億年(加/減1%)歷史o既話,以人類o既文化(一萬年,大家除下 10000 / 4550000000,我都好想知下人類有幾偉大…)去估計過去四十五點五億年發生過o既事,阿顏生你好似叻o左 D 喎…呢個其實同Watchmaker理論(見下文)有相同之處,都係話機率冇可能進化到人類出o黎。但係好可惜,生物o既形成同做手錶、做蛋糕有基本上o既差異。(詳細解釋請讀下文)

進化論之後就佢就開始狗o翕(up),話阿穌哥點點點,你要打開心門去接受佢 D 麻甩穌…LOL

好o肋,仲於等到佢狗o翕完畢,佢落台同人繼續狗o翕,我表姐夫推我上前去問佢o野(因為我當時同佢地講我唔信阿穌哥,事實上我o個時只有三分信阿穌哥)。咁我就係咁問佢問題,例如關於証明神o既實質存在,外星生物,相對論…等,佢係度支吾以對,根本就解讀唔到我 D 小學生問題。

最搞笑係,佢最尾就話:「你o既想法好危險,呢位弟兄,我唔會再同你討論有關阿穌o既問題…」之後佢拎轉面同第二個講o野,當睇我唔到…LOL

哇哇哇!!!雙博士啊!!!你又會點諗一個人咁樣同你傳道啊???

元旦崇拜

我成世人過過最無聊白癡o既元旦就係二零零三年o既呢一個…

我跟o左我表姐去佢個教會o既元旦崇拜,哇,呢個崇拜係聯合o左幾個唔同分陀o既教會,所以有成幾百人一齊發癲。成個崇拜有成三個鐘啊!三個鐘啊,大佬!!最搞o野係坐我隔離o個位台灣阿姐,佢嘗試話我知阿穌哥點,你信佢又會點,最慘係我唔識國語,九唔搭八…不過呢,講番台上邊夠班人,聲嘶力竭咁唱,又流淚,又大笑,佢地真係捨命為穌哥!!台下o個班一樣咁癡線…

二零零三年來臨o既一刻,全場高歌歡唱,我心裡靜靜o既,回想過去o既十年,都係壞事做盡,小五小六不斷係屋企偷錢,阿爸阿媽打到我死我都仲係要偷…中三貪得意偷o野俾人記小過…我做完呢 D o野之後,我去祈禱,我祈求赦免,我宜家發現,阿穌哥對我所作所為根本沒有影響。

神對我o黎講原來只係一個我腦裡面o既假想對象…

一月一日o既零晨,我祈o左最後一次禱,我同佢講,我會用呢一年去尋找我o既方向…

呢一年半,冇o左神o既寬恕,冇o左神o既廢話,我依然生存,我仍然為我自己同我父母而奮鬥。


我係無神論者,唔淨止係因為以上o既經歷,經過我思考過去讀過/聽過o既,有好多理論/言論/思想亦加強o左我作為一無神論者o既決心,下面係一 D 例子:

  1. 問:Watchmaker 理論,呢個理論講一個人拾到一隻手錶,佢會諗,呢隻錶宜家存在,就因為有一個人將細小o既組件組合起o黎,造成一隻手錶。咁樣推論,一個咁複雜o既宇宙,都一定有一個製造者,依聖經所講,o個個就係啊穌哥。
    答:呢個理論有幾個弱點。
    1. 造錶o個位人兄,係用現有o既物質去整隻手錶出o黎,但係,阿穌哥係用無o野去整個宇宙出o黎。呢兩個例子係基本上已經係非常唔同,所以呢個推論好難成立。
    2. 一隻手錶可以由一位人兄整出o黎,但係成個世界又點只得一樣o野啊???假如我地係沙灘度搵到個核子反應爐,我地都唔會假設個爐係個整錶佬整出o黎下話?咁講o既話,Watchmaker 理論應該提出多元製造者,每一個製造者負責成個創造o既其中一部分 (或者另一個宇宙,假如你容許宇宙唔只得一個)。
    3. o係Watchmaker 理論o既第一部分,我地總結一隻手錶唔係大自然o既一部分,因為隻手錶o既結構係被編排過o既,所以係大自然o既世界裡面,一隻手錶會係非常特別o既。(In the first part of the watchmaker argument we conclude that the watch is not part of the nature because it is ordered,and therefore stands out from the randomness of nature.) 但係,o係理論o既第二部分話大自然好明顯唔係隨機,但係又有次序o既原素。(Yet in the second part of the argument,we start from the position that the universe is obviously not random,but shows elements of order.) 所以,Watchmaker 理論本身已經係矛盾。
    4. 仲有,除o左理論o既邏輯矛盾,我地亦應該指出生物系統(biological systems)同機械系統(mechanical systems) 有好唔同o既運作方式。就算一袋零件係點撞,我地都唔會撞到隻錶出o黎,並唔等於撈埋 D 生物分子/混合物一齊,就一定唔會整到生物出o黎。(譯自:http://www.infidels.org/news/atheism/arguments.html
  2. 問:假如你信阿穌哥,但係原來阿穌哥並唔存在,你唔會有咩損失。但係如果你唔信阿穌哥,但阿穌哥真係存在o既話,你就會去地獄BBQ。所以呢,做無神論者係件好蠢o既事。
    答:呢個係叫 Pascal's Wager 理論。呢條理論有幾個弱點。
    1. 呢條理論並無話去信邊個教。事實上,呢個世界有好多矛盾o既宗教。我地通常會叫呢個做「避錯地獄」。假如有個人信一個宗教,佢有可能會去o左其他宗教o既地獄。假設阿穌哥存在,但係咁樣並唔等於淨係得一個神。係咁o既話,我地信邊個好呢?若果我地信晒佢地,我地應該跟邊個 D 教條啊??
    2. 條理論話:「假如你信阿穌哥,但係原來阿穌哥並唔存在,你唔會有咩損失」,呢個講法並唔正確。假設你信錯神,真正o個位可能會罰你,因為你低能過頭信錯神。同樣道理,大家可以諗下o個 D 寧願祈禱而拒絕食藥但係最尾屎o左o既病人。
    3. 假設穌哥係全知o既,佢一定會知你究竟係真信,定係因為驚去地獄 BBQ 所以至會信佢,你又諗下佢會點處置後者呢???
    4. 再者,呢個假設o既穌哥可能要你唔淨止信。大部分o既基佬都認為你除o左淨係信佢之外,你仲要服從佢。咁講法,「原來阿穌哥並唔存在,你唔會有咩損失」呢句就唔成立啦!
    5. 最後,假如阿穌哥係咁公正,佢唔應該以o個個人o既信仰o黎判,而係應該會以o個個人o既生平(在生時候o既所作所為) o黎判。如果阿穌哥鍾意罰 D 好人去地獄 BBQ,我諗都無幾個無神論者會認為呢個係值得崇拜o既神。
      (譯自:http://www.infidels.org/news/atheism/arguments.html
  3. 問:「根據聖經…」,「聖經說…」,「聖經証明…」
    答:好o肋,聖經係正確o既因為係經過穌哥o既批閱,穌哥存在係因為聖經話穌哥存在。大家知道咩係 Circular Logic 嗎??
  4. 問:聖經係全世界最暢銷o既書,你有咩睇法呢?你認為一本有咁多讀者o既書會有錯??
    答:我出o左一本鹹書,呢本鹹書威力無比,裡邊 D 模特兒索得o黎本書又夠平,所以個個人都會係床頭度放一本,因為每個人都買一本,我本鹹書成為o左香港第一號暢銷刊物。但係我本鹹書話其實每個人o既阿媽都有喉核,咁唔知你阿媽又係咪真係有粒呢?
  5. 問:人從來都冇變過,進化論係非常幼稚o既理論。
    答:有一次有個基佬(佢係美國人)o黎同我講,佢好藐視 D 馬騮/猩猩,佢話佢地好臭。其實我曾曾曾曾曾曾…阿爺係馬騮又有乜問題啊?我又好想知佢係咪認為佢 D 大便係咪香o既。進化論其實好簡單,每一樣生物都會進化。進化論就係變,變o既速度,變後o既品種係隨著環境o既改變而定。(詳細解釋:http://www.talkorigins.org/faqs/evolution-definition.html) 舉個例子,我地用疫苗對抗疾病,但係,經過一段時間,病菌會有抗疫苗o既能力。點解病菌能夠有咁樣o既轉變呢?假如病菌鬥唔過疫苗,病菌就會滅亡。所以,為o左生存,病菌要變種o黎配合環境o既轉變(疫苗)。有好多時候,生物會絕種,因為佢地適應唔到環境o既突變,恐龍就係一個好好o既例子。假如一顆小行星撞落地球度,你估人類有幾大生存機會呢??只要全球平均氣溫升或者跌幾度,人類就同恐龍冇乜分別。人類o係咁浩瀚o既宇宙,就好似大笨象腳下o既一粒沙…
  6. 問:若果真係冇神o既話,生命又有咩目的啊?
    答:我o既答案好悲哀,生命係宇宙o黎講其實一 D 意義都無。當然,我o既生命,可以好有意義,例如從我父母出發,佢地放咁多心血係我度,就顯出o左佢地對我生命o既重視。話說回來,生命對地球都冇乜意義。點解人類會出現係地球上面?生命只不過係一個過程裡面o既一部分,由一個品種o既誕生、繁殖、滅絕,就只不過係一個化學過程。點解細菌會存在?點解佢地要傳播同繁殖?生物為o左咩去生存啊?其實就係為o左繼續下一代,直至呢種生物滅亡。就如我之前所講,一粒小行星就可以同地球上所有o既生命畫個句號。

其實我仲有好多諗法都未講,不過我諗成四千幾字,暫時都夠啦掛?

最後,我要講聲多謝,感謝你o既時間,感謝站主俾機會我係度發o翕(up) 風。

ATHEIST FOREVER


連結本網 離教者之家 2004-2024