加入此網

兩三年前，就黎過呢個網，果時覺得只係有人頑固，唔明上帝既真理，所以先會聚集一個反基督既勢力。

一直以來，我都幾熱衷追求真理，覺得耶穌幾好，當然我都唔係話好乖好收心養性既教徒，但都係想向善既。

可惜，對其他身邊既教徒愈黎愈失望，具體上佢地無做ｄ咩黎害我，不過，見到佢地ｄ瘋狂行為，我會用「基督真理恐怖分子」黎形容佢地，亦可能係你地口中既邪基。

校園裡面，佢地成日以為自己咩都識，好熟聖經教訓，係一個基督徒圈子裡面想做最成熟最「聖潔」果個，但講既十為九之都係歪理（容後發表）；鐘意五六個圍埋一齊聽詩歌，如果嘈住佢地，咁就麻叉煩，又話你唔尊重上帝（極其量我都係唔尊重人姐）；更加激進既係祈禱黨，勁到連重安 windows 之前都要搵人同佢一齊祈禱，求神比佢智慧……

閒日一至五，幾乎日日有人要你參與祈禱咁濟，不過呢ｄ好小事姐。如果知道邊個唔信，成堆人會好有愛心咁夾埋黎幫你，即係催你入教。

學校有團契返，佢地死拉死扯都會盡力拖你入去，拖人上契果ｄ通常係恐基，最記得係一個恐基拖我去，我拒絕，佢就用勁溫柔加含情默默既眼神望住我講：「你唔可以咁架，耶穌愛你丫！」

自從我成功問到幾條恐基口啞，就開始有更多恐基盲基黎挑戰，最正係次次挑機失敗就叫我去搵宗教老師傾，依家你黎同我講道理定轉介我呢？不過恐基盲基都係人，我都好人道咁比台佢落，唔會再追問佢。

得閒週會堂又播下ｄ感情催俗見證片，睇到ｄ女同學喊晒，男同學乖晒咁睇，呢個時候敢傾計半句就死啦，輕則先生捉你黎插，問你識唔識尊重人，大則小息成堆人話你唔尊重上帝，唔尊重戲裡面個主角。其實最唔識尊重人果個係佢地，大把思維清晰既非基督徒，你係度要為上帝喊下，大家又要無端端陪你癲。

我自身覺得，一個宗教，要我地去「信」，唔係「完全明白」，只能夠憑感覺「信」既野，有某部分係唔合常理好正常，如果唔係點解要你去「信」姐？

聖經描述既上帝可能真係有好多難以理解既地方，外人睇可以話係錯處，如果你信既咪話「我依然相信上帝」囉，點解無本事為上帝辯解，都要強辭奪理去解釋？

解釋得到，就真係以理服眾，解釋唔到夾硬解釋，就係排他、思想封閉、自我幻想上帝，令人反感。

學校，老師同盲基同學（盲信耶穌乜都唔諗）好似夾定咁，狂灌輸「真理」。放學團契果日，唯一活動係返團契，唔比留係度打波，吹水，最多留係圖書館溫書；上週會堂，就算你唔信都要專心聽，否則當你搞事論，記名，好似假設左人人都信耶穌咁。

教會仲慘，因為我係教會唔多講野，唔係我內向，而係我同佢地真係唔熟，而且我覺得教會係寧靜既地方，想放鬆下自己。點知佢地話我無自信，逼我講野，有條友仲成日煩住我，滋擾丫，搞爛 gag 丫，猛開話題，乜都做齊黎聊我講野，真係關心到無微不至；仲成日搞好多遠遊聚會，我本身係唔鐘意去咁遠既人，跨區已經覺得好難頂，唔去佢地又群眾壓力，去我又勞役自己，真係救命。不過講返句公道既，裡面ｄ導師牧師都幾肯講道理，聽落都幾岩聽，我之前一直堅持返落去都係想聽多ｄ道理。

後來發現，學校裡面竟然有ｄ開基老師和同學（心態開放既基督徒）。我一向都鍾意諗生死問題同研習下哲學，最經典係係圖書館睇《李天命的思考藝術》，曾經比個學校職員行過黎話：「李天命？超！」真係吹脹，咁睇尼采同羅素咪踢我出校？後來我開始覺悟，原來身邊ｄ基督徒只不過係一堆迷信愚民，盲基恐基，實在忍唔住佢地。

漸漸，我做左好多脫教既野，宗教功課交篇質疑上帝既文章，傳道人回應叫我多ｄ祈禱；得閒問下ｄ盲基恐基宗教問題，笑下佢地ｄ偉論，依家講一次佢地ｄ歪理，有一次我問個盲基對話係咁：

我：上帝有無做靈魂比你？
盲：有。
我：你點知自己存在？
盲：咁我係有靈魂架嘛。
我：點知？
盲：每個人都有佢「精神上意志既一個靈體」。（類似係咁，個名詞真係好難捉摸，記唔到）
我：咩叫「精神上意志既一個靈體」？
盲：即係一個身體裡面既靈支撐住你個魂去維持你精神意志果個靈丫！（類似係咁，個解釋真係好難捉摸，記唔到）
我：解剖學發現唔到靈魂咩？
盲：你問咁多做乜姐，睇聖經啦。

呢個真係好經典既盲信例子，自從我用好水皮既能力去質疑佢地ｄ歪理，就被人當係反基。起初我都唔知架，有次去 camp，間房門口出面，夜晚見到個男恐基坐係個女同學隔壁傾計。初初我都唔知佢地傾耶穌，以為個恐基溝女，過去八下佢地講乜，點知佢地傾緊耶穌，個恐基係咁叫我走，條女問做咩要我走，個恐基仲話：「佢反基督架！」

完全吹脹，係我既立場，到依家都係：

我覺得基督教係個導人向善既宗教，好欣賞佢咁著重「愛」，有好多經文關於「愛」既都好有道理，而且有ｄ真係教你點做人。好可惜太多人盲基，自以為是，以為自己咁做就係好，逼人盲信。一如好多盲基果句：「錯既係人姐，唔係上帝。」當然我都覺做得上帝係唔會犯錯，而且都好明顯係ｄ盲基錯姐。一個導人向善既好宗教竟然比ｄ迷信者搞到令人反感，多得盲基。我相信自己唔係反基，只係反盲基。我自己好敬重ｄ開基，佢地個腦真係有運作，想遵行聖經教訓，會反省、改進、思考，明白唔係基督徒都係人，肯聽非基既感受，呢種基我真係欣賞。

唔知我會唔會有信返既一日，但我肯定即使我信返，都唔會做盲基恐基，佢地ｄ孤立利誘威逼對我係起唔到作用，我個腦唔係混淆，而係清晰、進取咁去思考人生。