新光戲院｜結業前開放日200人參觀 30年老員工：最後喇，應該無彎轉
新光戲院將於今年3月3日結業，昨（20日）舉辦開放日，有粵劇演員在場與市民交流。
【Yahoo 新聞報道】北角半世紀文化地標新光戲院將於今年3月3日結業，戲院昨（20日）舉辦開放日，逾200名市民到場參觀，並與粵劇演員拍照留念。有新晉粵劇演員指，新光是孕育多代粵劇老前輩的搖籃，「提起『新光』你就只會諗起『粵劇』」；即使轉換到新場地，希望觀眾將來繼續支持粵劇，「粵劇無唔見到，只係演出地方唔同咗」。新光經歷過多次倒閉危機，有30年老員工嘆謂，今次真的要說再見。 
開放日由早上10時至下午1時，早於9時許門外已現逾百人龍排隊等入場。
是次開放日為東區民政事務處主辦的「東區文化節」與新光戲院合辦。早於9時許新光現址的北角書局街已有近百人排隊，人龍一度伸延至毗鄰的馬寶道。市民入場後紛紛領取粵劇公仔鎖匙扣紀念品，並為新光每個角落留影，甫入門的舊式磅重機為受歡迎景點之一。 
市民可任意參觀戲院大堂、戲院及大劇院。
新光戲院門口擺放的舊式磅重機為受歡迎景點之一。
通往戲院的走廊擺放了不少新光歷史展板，不少市民駐足參觀。
有市民與粵劇演員合照。
市民可參觀戲院大堂、數碼戲院，並近距離欣賞大劇院舞台及樂池。經營新光戲院的李居明安排了數名年輕粵劇演員到場，在大堂與市民交流，吸引一眾戲迷爭相合照，更有人鬼馬地擺出粵劇演員常用甫士。在大劇院中，除了手機閃光燈處處，有人亦選擇於劇場觀眾席坐下，靜靜畫下眼前光景。 
市民可任意參觀戲院，院內共有108個座位。
「華光師傅保祐！請好好享受每一場演出！」
開放日期間亦設有兩場導賞活動，迅即額滿。參加者可到後台參觀，當中有一面鏡子貼上「華光師傅保祐！請好好享受每一場演出！」，每位演員出場前都會照一照鏡子，以象徵得到先師華光師傅護蔭，為新光戲院的傳統之一。 
有市民於大劇院中合照留影。
22歲的陳安橋為粵劇新晉演員，自小一開始學習粵劇，目前加入劇界近6年。對於可在開放日與市民合照留念，他非常興奮，「可以同北角嘅街坊、香港人見吓面，畀大家近距離接觸一吓粵劇」。安橋續指，他的第一台戲正正是在新光演出，這裡成為他演藝生涯的開端，「呢度個舞台感強啲，啲觀眾係坐得比較密啲，新嗰啲（場地）通常比較疏少少」。 
陳安橋為粵劇新晉演員，他的第一台戲正是在新光演出。
在新光做第一台戲 年輕粵劇演員：最傳統就已足夠 他續指，對比其他新場地，新光更貼近粵劇的傳統情懷，「因為粵劇本身最原始就係『一桌兩椅』，就已經完成到好多嘅佈景，例如想搭條橋，就係一張枱喺中間、兩張櫈就係上橋落橋，其實好靠粵劇嘅觀眾去想像呢個係咩場景，呢個先係粵劇最一開始傳落嚟嘅嘢」。雖然新式場地具備電子佈景可令舞台畫面更豐富，「但嚟到呢度（新光）就係，最傳統嘅嘢就已經足夠，由演員帶動觀眾想像台上嘅演員係經歷緊啲咩」。 新光有「粵劇殿堂」美譽，安橋對於新光戲院即將結業感到可惜，「呢度係培育咗好多粵劇演員，好多老前輩級嘅演員都有喺度演出過，提起『新光』你就只會諗起『粵劇』，唔會係諗起musical（音樂劇）或者其他嘢」。不過，他認為其他表演場地可以延續新光的使命，希望觀眾可繼續支持粵劇發展，「其實粵劇無唔見到，只係演出地方唔同咗」。
老員工大讚良心僱主：疫情3年「人工1毫子無少過」 後台工作人員劉先生於新光工作30年，「燈光、音響、放電影，基本上呢度乜都要做，人手少」，形容新光戲院為「第二個家」的他，坦言面對結業大感不捨，「好似屋企一樣咁熟悉，無辦法啦，到年紀順便退休」。一份工打足30年，劉指全因新光的人情味，「同事之間兄弟一樣，老闆真係良心老闆」。他憶述，疫情期間表演場地需關閉，但所有員工如常支薪，「人工1毫子都無少過，好難得，呢個係所有夥計真心說法」。 
後台工作人員劉先生於新光工作30年，大讚新光如家一樣熟悉。
30年來，劉於後台默默見證新光的變遷，包括演員和觀眾年輕化，「觀眾多咗後生，全靠粵劇界努力推廣」。新光以往多次經歷結業危機，成為劉職業生涯中最難忘的事，「呢次就無喇，最後喇，應該無彎轉」。 
劉先生最難忘是新光多次捱過結業危機，「呢次就無喇，最後喇，應該無彎轉」。
市民：搭巴士經過睇到好親切 張小姐與友人居於沙田，今早9時許就到場排隊參觀，但對來不及報名參觀導賞團大嘆失望，「李居明出錢出力，我哋應該嚟捧下場」。兩人平日不時會看粵劇，除了到居所附近的沙田大會堂，新光戲院亦是她們喜愛的場地，「沙田大會堂唔係正式做粵劇嘅地方，新光就比較係專做粵劇嘅地方」。張指，相比新場地，新光對她而言更是一個對北角區的回憶，「我好多時都會嚟北角呢度行吓，見到啲大戲畫布，搭巴士經過嗰陣會睇到，好親切」。對於將來改為教堂用途，張亦表示尊重，「事態係咁都無辦法啦，（業主）都取態咗，唯有第時喺其他地方再睇戲」。 
張小姐與友人專程從沙田前來參觀，認為新光是北角的地標，每次經過看見大戲宣傳版都感到很親切。
「我哋都係一齊大，經過嗰個歲月」 馬先生與粵劇演員合照時，鬼馬擺出演員表演甫士。他笑言並非「粵劇迷」，不過因新光具有歷史價值，故前來「打卡」留念，「梗係可惜啦！逢係有歷史價值嘅嘢，例如九龍城寨、呢類，我哋都係一齊大，經過嗰個歲月」。他認為新光情懷無與倫比，「啲人鋸扒點解要去扒屋？都係因為個情懷、個感受」。謝女士家住觀塘，因女兒介紹得知此活動而前來。她指平日較少看粵劇，不過下月會來捧場觀賞著名粵劇演員蓋鳴暉的「8天10場」，「呢度好熱鬧，唉好地地做乜拆咗佢啫？」 
謝女士（中）下月會來新光欣賞蓋鳴暉的「8天10場」。
李居明：感恩新光畀我哋嘅回憶 經營新光戲院的堪輿學家、「盛世天」劇團創辦人李居明亦有到來與市民交流，並帶領市民參觀戲院大堂和劇院，又特別介紹劇院台前的樂池，「呢個劇院真係世界級，樂池唔容易做㗎，新開嘅劇院都要嚟新光度取經」。 對於新光結業，他指曾與新業主教會討論雙贏方案，「唔使殺咗新光㗎，你租返畀我唔得咩？我無反對你擺十字架，但你都無得反對我拜華光師傅」，惟由於宗教的問題，雙方難以達成共識。作為新光「白武士」，他雖不捨但並不難過，「每人嘅一生都會遇到離開，應該懷念佢畀我哋嘅嘢，用樂觀嘅態度感謝新光畀到我哋嘅嘢」。他指，開放日吸引大批市民前來參觀，已力證新光的意義，「證明香港人對新光好有感情，香港有情、人間有情」。 
經營新光戲院的堪輿學家、「盛世天」劇團創辦人李居明亦有到來與市民交流。
新光戲院早於1972年開幕，戲院共有1個劇場及1個電影院，分別能容納 1033 及 108 觀眾，劇場同時亦可當作大型電影院使用。新光戲院為本地粵劇界的標誌性表演場地，更曾獲選為2009年美國《時代雜誌》「遊客不容錯過的亞洲體驗」第7位。 新光戲院以往多次出現經營危機。2003年，裕泰興地產家族成員羅守輝以約1.6億元購入北角英皇道僑輝大廈（新光戲院現址）業權後，一度因加租令經營新光戲院的聯藝考慮結業，但因粵劇界人士力爭而續租。2011年，聯藝決定不再續租，新光戲院原需於2012年2月結業，後來李居明接手續租新光至今。直至去年2月，羅守輝以7.5億元易手予Island ECC教會，教會發信予李居明要求收回物業。 
新光戲院以往兩度出現經營危機，但均能平安度過。
https://hk.news.yahoo.com/%E6%96%B0%E5%85%89%E6%88%B2%E9%99%A2%EF%BD%9C%E7%B5%90%E6%A5%AD%E5%89%8D%E9%96%8B%E6%94%BE%E6%97%A5200%E4%BA%BA%E5%8F%83%E8%A7%80-30%E5%B9%B4%E8%80%81%E5%93%A1%E5%B7%A5%EF%BC%9A%E6%9C%80%E5%BE%8C%E5%96%87%EF%BC%8C%E6%87%89%E8%A9%B2%E7%84%A1%E5%BD%8E%E8%BD%89%EF%BD%9Cyahoo-032924041.html | 
2023/11/27 21:59
| 
