新財政預算案, 綜援人仕, 低收入, 黑工

啱啱收工睇到無記既新財政預算案特輯,好火滾!

佢派唔派糖,派幾多糖,老實講句我唔係真係太care,反正都已出之物.收得番當然係bonus,收唔番亦只可以算,無論我有幾唔滿意呢班白痴政府同班狗官既表現都好;佢回水只係應份.

但跟手無記post up咗幾個cases,一個係攞綜援既,話樣樣野都貴,派雙糧唔夠;另一個係一位六十二歲無攞綜援既女士,無住公屋,無強積金,做part time家務助理一個月賺三千幾,佢仲火滾,話乜都無佢份,得電費有回扣.

睇完呢兩個cases, 我個心最多係唔高興.乜事個乜都唔做既重惡過個乜都唔攞既呢?都算啦...

然後電視又賣話拉到黑工,話有一班由菲律賓同巴基斯坦等地黎既黑工從事回收行業,一日賺大約七十蚊.我睇埋呢個case就真係無明火起三千丈.

自己出黎碌咗都十幾二十年,親眼睇住成個香港社會既所謂轉型.得出八個字:非驢非馬,不知所謂!

當大家係見到日本人既創意工業有幾成功時,有無諗過呢個三朝唔埋兩朝地震既島國有乜辦法可以係戰後既一堆瓦礫中崛起?當大家見到美國係呢一個世紀間,又內乜理由可以由二十年大蕭條到四十年前開始可以實行霸權主義?答案就係得一個:錢要投放咗落去正確既地方.日本由齋抄美國電器到自己有原創科技,有亞洲世上數一數二既設計,係因為佢地係戰後投放咗大量既資源去做各種各類既設計同研究工作,著名既新力公司,係盛田昭夫既時期,所有純利,會投放百之九十去做研究新產品.Microsoft既Bill Gate,雖然佢係有一次去參觀Apple Corp,睇到人地個interface就抄番一個出黎,但無疑佢早期由window 3.1到98SE,投放落去研究新系統既錢,已經接近當時window股價連資產既百份之四十.

但而家香港,連抄都無得抄.點解?就係因為好似呢個topic所講既野.

第二行唔敢講,就以成衣業為例.大約六十年代,以前香港既紡織,漂染,配料同成衣技術都唔係咁先進.但因為當時香港既生產成本相對比較低,咁既然生產線係呢度,無辦法,唯有唔識做到識.到六十年代後期,因為大陸文化大革命,為香港帶黎好大量既勞動人口同技術.到咗七十年代中後期,香港己經開始有自己既原創技術,亦因為工人搵到食,好多人投身呢個行業,亦相應帶動咗相關行業得到更大既生存空間.八十年代初大陸開放改革,亦同時有唔少國營企業做外銷,但因為質量控制得唔好同政策既混亂,一路到八十年代既中後期好多外商都聞大陸色變;當時大陸唯一既好處就係唔駛驚配額呢個問題,因以前香港係你有錢就一定買到出口既配額,而且價錢日日變,淡季同旺季可以差十幾二十倍.但同時,香港既高地價政策,產生咗一班以炒買炒賣既人發其大財,亦同時令到生產成本暴升;而政府亦漠視當時工業既健康發展.好多廠家係無得選擇同之下,只好將生產基地轉移到大陸,其中珠三角更加係一個集中地.到咗九十年代既中期,香港幾乎已經無晒正規既工廠.可能有好多人會話政府公報既數據唔係喎;但你睇埋下面就明白.

一個無咗工業既社會,無咗當時差唔多涉及成個國民生產總值三之一有多既收入點算?旅遊業又唔可能一時間吸引多一佔既遊客黎;服務行業又養唔到咁酒樓卡拉ok;唯一既出路就係金融.但有幾多人知道,金融業真係養到幾多人呢?以前政府好叻掩飾,成日話出口量同稅收無好大既升跌;但各位要知道,去大陸開廠,個老闆就梗係會帶埋客同單上去,但落單就點都會係香港落香港走貨,因為當時始終都係香港轉錢方便過大陸好多,而且香港港口當日做得比大陸有系統,無話咁多麻煩;咁個老細最多派三兩個人上去睇住間廠,自己就留十幾二十人係香港搞接單跟單船務會計.但原本間廠可能有三百工人搵食,大部份都係低技術勞工.咁佢地無得撈,做乜呢?以前好景時生性既,個袋度有兩個錢剩,咁做吓其他生意囉炒樓炒股咁;但當時未搵到第一桶金既又點呢?咪睇吓有無其他廠請人返大陸,又或者開始轉營,樣樣都做吓,睇吓邊樣搵到食既咪乜都做囉.時到今日,呢個process做咗十年,你下次搭的士又問吓有幾多的士司機當年係廠出身吖?

我想講既係,一個地方無資源,人就係最大既資源.但香港政府從來無實際咁諗過點樣令人更值錢,只會等班友仔自己諗掂佢.工業向來都係勞動力既消化場,草根階層既救生圈.但任由高地價政策扼殺晒草根階層既生存空間,佢地一般都係文化水平比較低,但你班狗官大大個政府就唔識話為佢地諗吓.

好啦,今年庫房搵到錢,二話不說費事俾人話唔還富於民,大拿拿四百億攞出黎派.我重好記得當日俾人兇過,話七年就會玩晒政府庫房既錢,言猶在耳,今年就有錢派.夏鼎基果句"量入為出"過咗時哩咩?唔好忘記,港府呢年既收入,咪又係賣地炒股得番黎既.講到真真正正既市場競爭力,唔係無,不過已經不能同日而語!

有四百億,其實可以做更多比派糖更有用既野.佢都識話個社會老化,咁點解唔係個社會完全老化之前,令呢班人既生產力得到發揮呢?好等大家到老都重有塊瓦遮頭,有個錢買餸呢?反而要攞去養一班唔知點解係屋企無所事事既人,出雙糧俾佢重話唔夠呢廢柴呢?點解一個細過六十五歲既女人,可能因為佢自己一生人唯一剩低就係得番層樓或者銀行果十萬八萬,所以連開庫房派糖都幾乎唔關佢事呢?係咪因為人地身價平,肯收你地一半人工但又無作奸犯科既黑工會影響香港做唔到東方之珠就俾人係度做呢?

當大家見到街邊無乜小販,請唔好唔記得曾經好多人都係一把較剪剪腸粉養大一家六口;
當大家見到街邊無乜貨櫃,請唔好唔記得曾經好多人都係身水身汗擔擔抬抬養阿爸阿媽;
當大家見到街邊無乜工廠,請唔好唔記得曾經好多人都係無文化又無技術亦有生存空間;

請曾俊華先生睇吓呢個建議,下次又要洗四百億既時候,會唔會呢個真真正正"還庫於民",唔係我打錯,而係想你"還返個庫房俾香港市民":

a. 以三百億成立一個基金作為香港既工業發展之用,例如:
- 提供遠低於市價既平租廠房或工業用地,不得作住宅或商業用途,工廠附辦公室不在此限,但不能超過一定比例;
- 每位入廠做既工友需要於政府資料庫免費登記身份資料及八達通,其登記將只作工業用途,絶對唔會同任何其他商營機構或信貸資料庫通用;如遇八達通遺失,補辦登記將如身份證一樣,手續費為三百大元,扣除行政費後收入歸基金;
- 由政府與各生產械材代理作中介,提出集體機械平價訂購;
- 重新開設工業學院既夜間普通文憑課程,並增設職前培訓;
- 按比例成立廉價日間託兒所及老人暫托中心;
- 成立強制性個人勞工保險制度,由政府及廠方平分費用;
- 協助工廠通過各種主要的國際標準;
- 首五年工廠純利百份之十再投入基金,另百份之五投入有關工業之新技術研究之用;工廠首五年免稅;
- 設立中央工業廢水處理;
- 如發現任何工廠違規使用政府提供既地方或優惠,全廠器材充公,將工廠交由特派員代理,直至有買家購入,收入歸基金;
- 每張合約為期五年,每五年再評估是否符合上述要求;
- 開放工業區附近某些地區供小販限時擺賣;
- 三間巴士公司於星期一至六提供優惠時段與工友;
- 兩間電力公司重新評定工業用電費;
- 港鐡於星期一至六提供優惠時段與工友;

b. 所有四肢健全五官齊整,無影響工作能力病痛既綜援者:
- 硬性規定要進入獲資助工廠內工作,保留免費入住公屋資格,取消綜援金;
- 如因工作散慢被廠方解僱三次者,一經查證,即被取消免費公屋;
- 如家庭收入年入超過入息HKD108,000者,即取消免費公屋;

c. 容許廠以四比一比例引入外地勞工,外勞需自購個人性勞工保險;

d. 以一百億派糖,但會只係今次既四份之一,但相信有此規定綜援人數大減,原本有手有腳無病無痛領綜援果份俾埋老人家同其他綜援戶

一人計短,各位弟兄請俾吓意見啦喂!

[ 本帖最後由 Jom 於 2008-2-28 00:28 編輯 ]

回復 2# weakest 的帖子

所以我特別提到那一份係艱難時候既財政司.

http://www.info.gov.hk/hkma/chi/viewpt/991007c.htm

如果佢果套係過時既,即係話你所講既Economics都己經過時,或者有某部份過咗時啦.而家,中央興...呀唔係,係潮流興行政主導吖嘛.咁經濟又係香港人最睇重既一環,咪係呢方面做D野,粉飾吓太平...

當一個地方既政權要向當地財閥或者更高領導層交待既時候,咪會有咁既情況發生囉.
今日港紙對人民幣既匯率係RMB1.00對HKD1.0945.黎緊呢兩三年,如無意外,人民幣同港幣最少拉開至1:1.20呢個水平.係呢度,己經有份之十到二十既差別.

今年大陸實行既新勞動法,成日話珠三角有接近一萬家工廠要走或做.不如講得在D,國務院外經貿發出既資料講話計過條數,係新勞動法生效之後既整體成本,會係增加百份之三十.

大陸係電費比起香港根本差唔到好多,但水費同其他排汅費就貴一個double;而稅就大陸比香港重接近50%,而家大陸既所得稅稅率係25%.

當你計好晒條數,香港同大陸係人力資源價錢同稅率上既分差,己經再無任何優勢.剩低既就係生產成本中既原材料同地價成本.原料既問題,其實全世界都一樣,全球化之後好多原料都可以做到產地直銷,而係唔同地區做成價錢既差別亦越收越窄.而且因為香港係free port,無論料進出口都有一定優勢.唔一定剩係要用大陸料.

係地價成本方面,如果可以由政府提供協助.我係話而家政府無做,但做得黎實在係醫到頭醫唔到腳.因為好似阿染兄話齋,班狗官係有心將香港成個收入既結構轉型到第三級生產,即係金融服務零售旅遊.但,香港係咪經已去到適合用呢幾樣野黎當家呢?我絕對係話其他既行業搵唔到錢,而係從事第三級生產既一般從業員,文化水平至到個人水平都有較高既要求.當一個社會既教育推行得好同全民教育水平達標既時候,會比社會中教育水平參差得好,引起既震盪亦比較低.但呢呢十年,新移民既湧入;以前做廠,又未能同政府要全民"三級生產"呢個政策接到軌既市民,其實都有大既生產潛力.

如果加上世界工廠 - 大陸面對住成本既問題.香港本身既優勢.其實係可以俾個機會呢一群人更全面咁發揮佢地既作用.另一方面,開始既時候就一定係生產普通難度既生產.以我接觸過既大部份外商而言,如果港既生產成本只係高過大陸既5%左右,佢地都會好樂意嘗試將訂單放返黎香港.唔係話大陸唔好,只係開放改革接近三十年既今日,大家都依然認為香港當時既產品質量,實在係同大陸重有一段距離.

呢班本來只可以做本土消費生意/閒賦既人,就可以成為賺支外匯既其中一員.再加上大陸呢個半開發既市場,做大陸本土內銷亦係另一條既出路.而且基金入面亦包括咗科研既項目,當香港再有本土既原創技術,加上生產線.當然更係另一種吸引外資/大陸

另外,政府之前出過既政策,係用低於市價既六成去出租一D廠房同地.但要知道果D地或廠房都係無乜價值既二級用地,各方面既配套都唔掂.所以好多都變咗做倉.但我提出既呢個方案,反而想將好似屯門工業區呢一類比較接近綜緩重災區既舊工業大廈重新用特平吸引人設置廠房.一來造就返一D職位,二來亦可以改變一下綜援戶既人態.當然我唔係話每一個綜援戶都係有心呃飲呃食.但總好過由得大量閒人食閒飯,佢地未必係每一個都想食閒米,唔可以排除有少人只係文化/能力唔夠而搵到野做.係香港政府決定將呢班人當係禽流雞咁殺晒之前,似乎呢會係一個三贏既方法.

染兄既points好有見地,等我參詳吓夜少少再講.

[ 本帖最後由 Jom 於 2008-2-28 16:57 編輯 ]
高級模式 | 發新話題
B Color Image Link Quote Code Smilies
換一個